USA: బీరువాలో 14 ఏళ్ల బాలిక.. ఎలా వచ్చిందో తెలియదంటున్న ఇంటి యజమాని.. 18 నెలల క్రితం అదృశ్యమై.. గర్భవతిగా..
ABN, First Publish Date - 2023-02-13T19:32:05+05:30
అమెరికాలో అదృశ్యమైన ఓ బాలిక మరో ఇంట్లోని బీరువాలో పోలీసులకు చిక్కడం సంచలనంగా మారింది.
ఇంటర్నెట్ డెస్క్: పధ్నాలుగేళ్లున్న ఆ బాలిక 18 నెలల క్రితం అదృశ్యమైంది(Missing). పోలీసులు ఆమె ఆచూకీ తెలుసుకునేందుకు తీవ్రంగా ప్రయత్నించసాగారు. ఇంతలో వారికి కీలక సమాచారం అందడంతో గత మంగళవారం ఓ ఇంట్లో గాలింపు చర్యలు చేపట్టారు. ఈ క్రమంలో ఓ బీరువాలో(Wardrobe) బిక్కుబిక్కుమంటూ కనిపించిన ఆ బాలికను చూసి పోలీసులు నిర్ఘాంతపోయారు. అమెరికాలోని(USA) మిషిగాన్ రాష్ట్రంలో(Michigan) పోర్ట్ హ్యూరాన్‌లో(Port Huron) వెలుగు చూసిన ఈ ఘటన సంచలనం రేకెత్తిస్తోంది.
పోలీసులు ఆమె తల్లిపైనే అనుమానాలు వ్యక్తం చేస్తున్నారు. బాలిక అదృశ్యం కాకమునుపు ఆమె తల్లి వద్దే ఉండేది. ఆ తరువాత..బాలిక ఆచూకీ కనుక్కున్న తల్లి ఆమెను వేరు వేరు ఇళ్లల్లో దాచిపెట్టి ఉండొచ్చని పోలీసులు అనుమానిస్తున్నారు. ప్రస్తుతం బాలిక కనిపించిన ఇంట్లో ఇద్దరు పురుషులు పోలీసులకు కనిపించారు. అయితే..బాలిక ఎవరో..? బీరువాలో ఎందుకు ఉందో తమకు తెలీదంటూ ఆ ఇద్దరూ పోలీసులతో గట్టిగా వాదించారు.
ఇక బాలికకు వైద్య పరీక్షలు జరపగా ఆమె గర్భవతి(Pregnant) అని తేలింది. దీంతో.. అసలేం జరిగిందో తెలుసుకునేందుకు విస్తృత దర్యాప్తు ప్రారంభించారు. కాగా.. తన తండ్రితోనే ఉంటానని బాలిక స్పష్టం చేయడంతో ఆమెను తండ్రికి అప్పగించారు. బాలికను తల్లే కిడ్నాప్ చేసి ఉండొచ్చని అనుమానిస్తున్నారు.
Updated Date - 2023-02-13T19:32:06+05:30 IST