Jasprit Bumrah: 90 ఏళ్ల రికార్డు బ్రేక్.. వైజాగ్ టెస్ట్ మ్యాచ్‌లో చరిత్ర సృష్టించిన బుమ్రా..!
ABN, Publish Date - Feb 05 , 2024 | 07:21 PM
తన సంచలన బౌలింగ్‌తో 90 ఏళ్ల నాటి రికార్డును బుమ్రా బద్దలుగొట్టాడు. 1934లో చెన్నైలో జరిగిన టెస్ట్ మ్యాచ్‌లో భారత బౌలర్ అమర్ సింగ్ క్రియేట్ చేసిన రికార్డును బ్రేక్ చేశాడు.
ఇంగ్లండ్‌తో వైజాగ్‌లో జరిగిన టెస్ట్ మ్యాచ్‌లో (India vs England) టీమిండియా 106 పరుగుల తేడాతో ఘన విజయం సాధించింది. సిరీస్‌ను 1-1తో సమం చేసింది. భారత బౌలర్లు చెలరేగడంతో టీమిండియా మరో రోజు మిగిలి ఉండగానే గెలుపు జెండా ఎగురవేసింది (Team India Victory). ఈ మ్యాచ్‌లో 9 వికెట్లతో జస్ప్రీత్ బుమ్రా (Jasprit Bumrah) ఇంగ్లండ్ పతనాన్ని శాసించాడు. తొలి ఇన్నింగ్స్‌లో 6 వికెట్లు పడగొట్టిన బుమ్రా.. రెండో ఇన్నింగ్స్‌లో మూడు వికెట్లు తీశాడు. ``ప్లేయర్ ఆఫ్ ది మ్యాచ్``గా నిలిచాడు.
వైజాగ్ టెస్టులో బుమ్రా తన కెరీర్‌లో రెండో అత్యుత్త‌మ టెస్టు గ‌ణాంకాల (9/91)ను న‌మోదుచేశాడు. 2018లో ఆసీస్‌పై 86 పరుగులిచ్చి 9 వికెట్లు పడగొట్టడం బుమ్రా కెరీర్ బెస్ట్. తాజాగా తన సంచలన బౌలింగ్‌తో 90 ఏళ్ల నాటి రికార్డును బుమ్రా బద్దలుగొట్టాడు. స్వదేశంలో ఇంగ్లండ్‌తో జరిగిన ఓ టెస్ట్ మ్యాచ్‌లో 9 వికెట్లు పడగొట్టిన ఇండియన్ పేసర్‌గా నిలిచాడు. 1934లో చెన్నైలో జరిగిన టెస్ట్ మ్యాచ్‌లో భారత బౌలర్ అమర్ సింగ్ 8 వికెట్లు పడగొట్టాడు (Jasprit Bumrah Record).
1934 నుంచి ఇప్పటివరకు అమర్ సింగ్‌దే బెస్ట్ పేస్ బౌలింగ్ రికార్డుగా ఉంది. తాజా మ్యాచ్‌లో బుమ్రా.. అమర్ సింగ్‌ను అధిగమించాడు. అలాగే చేతన్ శర్మ (10/188) తర్వాత ఇంగ్లాండ్‌తో జరిగిన ఓ టెస్టు మ్యాచ్‌లో ఉత్తమ బౌలింగ్ గణాంకాలు నమోదు చేసిన భారతీయ సీమర్‌గా బుమ్రా నిలిచాడు.
Updated Date - Feb 05 , 2024 | 07:21 PM
