వరంగల్‌ జిల్లాలో దారుణ హత్య
ABN, First Publish Date - 2021-07-11T08:27:00+05:30
ఉదయాన్నే వాకింగ్‌ చేస్తున్న ఒక వ్యక్తిని భూ తగాదాలు, పాతకక్షలతో మరో వ్యక్తి గొడ్డలితో అత్యంత దారుణంగా నరికి హత్యచేశాడు. ఈ ఘటన వరంగల్‌ అర్బన్‌ జిల్లా కాజీపేట మండలం
మడికొండ, జూలై 10: ఉదయాన్నే వాకింగ్‌ చేస్తున్న ఒక వ్యక్తిని భూ తగాదాలు, పాతకక్షలతో మరో వ్యక్తి గొడ్డలితో అత్యంత దారుణంగా నరికి హత్యచేశాడు. ఈ ఘటన వరంగల్‌ అర్బన్‌ జిల్లా కాజీపేట మండలం మడికొండ శివారు రాంపేటలో శనివారం జరిగింది. కాజీపేట ఏసీపీ రవీంద్రకుమార్‌ తెలిపిన వివరాల ప్రకారం.. రాంపేటకు చెందిన ఏల్పుల సమ్మయ్య అలియాస్‌ అల్లాసేట్‌(54)కు, అదే గ్రామానికి చెందిన సమీప బంధువు దాడబోయిన శంకరయ్యకు కొంతకాలంగా భూ తగాదాలు ఉన్నాయి. కొన్నేళ్ల క్రితం సమ్మయ్య శంకరయ్యపై దాడి చేశాడు. గ్రామంలో నిర్వహిస్తున్న ఓ వాటర్‌ ప్లాంట్‌ విషయంలో కూడా ఇద్దరూ గొడవ పడ్డారు. తనకు చెందాల్సిన భూమి తన సమీప బంధువులు అక్రమంగా పట్టా చేసుకున్నారని, ఈ విషయంలో పెద్ద మనిషిగా ఉన్న సమ్మయ్య ఆ భూమి తనకు దక్కకుండా చేశాడని శంకరయ్య పగ పెంచుకున్నాడు. సమ్మయ్య ఉదయం వాకింగ్‌ చేస్తూ మడికొండ వైపునకు బయలుదేరాడు. కుమ్మరిగూడెం, మడికొండ శివారులోని మైసమ్మకుంట వద్ద అప్పటికే అదును కోసం చూస్తున్న శంకరయ్య, సమ్మయ్య రాగానే ఒక్క సారిగా గొడ్డలితో దాడిచేసి కాళ్లు, తలపై విచక్షణారహితంగా నరికి పరారయ్యాడు. సమ్మయ్య అక్కడికక్కడే మృతి చెందాడు.
Updated Date - 2021-07-11T08:27:00+05:30 IST