అమరావతి అభివృద్ధితోనే రాష్ట్ర ప్రగతి
ABN, First Publish Date - 2023-02-08T00:16:10+05:30
ఒక్క రూపాయి తీసుకోకుండా రాజధాని అమరావతికి 33వేల ఎకరాలిచ్చామని, అందుకు ప్రతిఫలంగా ఈ ప్రభుత్వం వచ్చిన తరువాత తమను రోడ్డుపాలు చేసిందని రాజధాని అమరావతి రైతులు ఆవేదన వ్యక్తం చేశారు.
తుళ్లూరు, ఫిబ్రవరి 7: ఒక్క రూపాయి తీసుకోకుండా రాజధాని అమరావతికి 33వేల ఎకరాలిచ్చామని, అందుకు ప్రతిఫలంగా ఈ ప్రభుత్వం వచ్చిన తరువాత తమను రోడ్డుపాలు చేసిందని రాజధాని అమరావతి రైతులు ఆవేదన వ్యక్తం చేశారు. బిల్డ్‌ అమరావతి, సేవ్‌ ఆంధ్రప్రదేశ్, హైకోర్టు తీర్పును అమలు చేయాలంటూ రైతులు, మహిళలు, రైతుకూలీలు చేస్తున్న ఆందోళనలు, నిరసనలు మంగళవారం 1148వ రోజుకు చేరుకున్నాయి. ఈ సందర్భంగా రైతు ధర్నా శిబిరాల నుంచి వారు మాట్లాడుతూ అమరావతి అభివృద్ధితోనే రాష్ట్రప్రగతి ముడిపడి ఉందన్నారు. కానీ దానిని నాశనం చేయడమే అజెండాగా పాలకులు పనిచేస్తున్నారని ఆగ్రహం వ్యక్తం చేశారు. మూడు ముక్కల ఆటను ఐదుకోట్ల మంది తిరస్కరించారన్నారు. అయినా ఈ ప్రభుత్వానికి జ్ఞానం రాలేదన్నారు. మూర్ఖంగా మూడు రాజధానులని ముందుకుపోతే రాష్ట్రం అధోగతి పాలు కాక తప్పదన్నారు. ఇప్పటికైనా సీఎం జగన్‌రెడ్డి హైకోర్టు తీర్పును గౌరవించి అమరావతి అభివృద్ధిని కొనసాగించాలన్నారు. బిల్డ్‌ అమరావతి, సేవ్‌ ఆంధ్రప్రదేశ్ అంటూ దీపాలు వెలిగించి అమరావతి వెలుగు కార్యక్రమం కొనసాగించారు. రాజధాని 29 గ్రామాలతో పాటు మంగళగిరి, తాడికొండ నియోజకవర్గాల్లోని రైతులు బిల్డ్‌ అమరావతి అంటూ ఆందోళనలు చేశారు.
Updated Date - 2023-02-08T00:16:12+05:30 IST