బైక్‌ ఆపలేదని పోలీసుల ప్రతాపం
ABN, First Publish Date - 2023-02-10T00:44:41+05:30
బైక్‌పై వస్తున్న దంపతులు వాహనాన్ని ఆపలేదని పోలీసులు తమ ప్రతాపాన్ని చూపారు.
ఆదోని/ఆదోని(రూరల్‌), ఫిబ్రవరి 9: బైక్‌పై వస్తున్న దంపతులు వాహనాన్ని ఆపలేదని పోలీసులు తమ ప్రతాపాన్ని చూపారు. ఆదోని మండలం కపటి గ్రామానికి చెందిన నారాయణ, సుభద్రమ్మ దంపతులు తమ బైక్‌పై ఆదోనికి పని నిమిత్తం బయలుదేరారు. నెట్టేకల్లు గ్రామ క్రాస్‌ వద్ద ఆంజనేయస్వామి విగ్రహం ముందు తాలుకా పోలీసులు వాహనాలు తనిఖీ చేస్తున్నారు. బైక్‌ పై వస్తున్న నారాయణ దంపతులు బైకును ఆపాలని పోలీసులు సూచించారు. తన బైక్‌ వెనుకాల లారీ వస్తుండటంతో కొద్దిగా ముందుకు వెళ్లి బైక్‌ ఆపి తనిఖీ చేస్తున్న పోలీసుల వద్దకు వచ్చారు. బైక్‌ ఆపకుండా ముందుకు వెళ్లి ఆపుతావా, నీకు ఎంత ధైర్యం... అంటూ నారాయణను పోలీసులు చితకబాదారు. లారీ వెనుక వేగంగా వస్తున్నందు వల్లే ఆపలేకపోయానని, కొంచెం పక్కగా వెళ్లి ఆపానని చెప్పినా వినకుండా విచక్షణా రహితంగా కొట్టారని బాధితుడు ఆవేదన వ్యక్తం చేశారు. తీవ్రంగా గాయడటంతో భార్య సుభద్రమ్మ, స్థానికుల సహాయంతో ప్రభుత్వ ఏరియా ఆసుపత్రికి తరలించారు. పోలీసులపై చర్యలు తీసుకోవాలని బాధితులు డిమాండ్‌ చేశారు.
Updated Date - 2023-02-10T00:44:45+05:30 IST