YCP Minister: రజనీకాంత్ సూపర్‌స్టార్‌ అంటూనే మంత్రి అమర్నాథ్ కీలక వ్యాఖ్యలు
ABN, First Publish Date - 2023-05-02T18:28:43+05:30
టీడీపీ అధినేత నారా చంద్రబాబునాయుడుపై (Nara Chandrababu Naidu) సినీ నటుడు సూపర్‌స్టార్‌ రజనీకాంత్ (Superstar Rajinikanth) చేసిన వ్యాఖ్యలనే వ్యతిరేకించామని మంత్రి అమర్నాథ్ (Minister Amarnath) అన్నారు.
అమరావతి: టీడీపీ అధినేత నారా చంద్రబాబునాయుడుపై (Nara Chandrababu Naidu) సినీ నటుడు సూపర్‌స్టార్‌ రజనీకాంత్ (Superstar Rajinikanth) చేసిన వ్యాఖ్యలనే వ్యతిరేకించామని మంత్రి అమర్నాథ్ (Minister Amarnath) అన్నారు. సినిమాల్లో మాత్రమే రజనీకాంత్ సూపర్‌స్టార్‌ అని, ఒక్కసారి చెబితే వందసార్లు ఫీల్ అవడానికి రాజకీయాలు సినిమా కాదని మంత్రి అమర్నాథ్ స్పష్టం చేశారు. ఈ విషయం అర్థమయ్యే రజనీకాంత్ పార్టీ విషయంలో వెనక్కి తగ్గారనుకుంటున్నానని మంత్రి అమర్నాథ్ పేర్కొన్నారు.
‘టీడీపీ అధినేత చంద్రబాబు విజనరీ’ అంటూ తమిళ సూపర్‌స్టార్‌, తలైవర్‌ రజనీకాంత్ చేసిన ప్రశంసల పట్ల వైసీపీ నేతలు స్పందించిన తీరుపై ఆయన అభిమానులు రగిలిపోతున్నారు. ఎవరిపట్ల అయినా మంచిగా స్పందించే రజనీ వ్యక్తిత్వాన్ని కించపరిచేలా వైసీపీ నేతలు మాట్లాడడమేంటంటూ ఆగ్రహం వ్యక్తం చేస్తున్నారు. మరీ ముఖ్యంగా ఆంధ్రప్రదేశ్ సరిహద్దు జిల్లాలైన తిరువళ్లూరు, వేలూరు, కాంచీపురం తదితర జిల్లాలకు చెందిన అభిమానులు వైసీపీ తీరు పట్ల తీవ్ర అసంతృప్తితో ఉన్నారు. ‘చంద్రబాబును రజనీ పొడిగితే వీళ్లకెందుకంత బాధ’ అంటూ తీవ్రంగా స్పందిస్తున్నారు. ఈ క్రమంలో తమిళనాడులో పర్యటిస్తున్న ఏపీ పర్యాటకశాఖ మంత్రి, నటి రోజాకు నిరసన తెలపాలని కిందిస్థాయి అభిమానులు తలపోశారు. అయితే రజనీ అభిమాన సంఘాల్లోని సీనియర్ల సూచనలతో వారు వెనక్కి తగినట్లు తెలిసింది.
‘‘ఏమాత్రం లోకజ్ఞానంలేని వైసీపీ నేతలు తెలిసీ తెలియక తమ తలైవర్‌ గురించి మాట్లాడడాన్ని అర్థం చేసుకోవచ్చు. కానీ తమిళ సినిమాల్లో నటించి, రజనీ వ్యక్తిత్వం గురించి తెలిసిన రోజా కూడా ఆయన పట్ల అనుచితంగా మాట్లాడడమేంటి? వచ్చే ఎన్నికల్లో ఆమెకు వ్యతిరేకంగా ప్రచారం చేసి తీరుతాం’’ అని తిరువళ్లూరు జిల్లాకు చెందిన రజనీ వీరాభిమానులు తెలిపారు. రోజా నియోజకవర్గం నగరిలో తమిళుల ఓట్లే అధికమన్న విషయం ఆమె మరిచిపోయినట్లుందని వారు నర్మగర్భంగా వ్యాఖ్యానించారు. తమిళ సినీ వర్గాలు సైతం రజనీపట్ల వైసీపీ నేతలు చేస్తున్న విమర్శలపై అసంతృప్తితో ఉన్నాయి.
Updated Date - 2023-05-02T18:35:33+05:30 IST