సమయపాలన పాటించని ప్రభుత్వ ఉద్యోగులు
ABN, First Publish Date - 2023-02-27T23:04:57+05:30
తాళ్లూరు, మండల అధికారులు బొత్తిగా సమయపాలన పాటించడం లేదు. సోమవారం కొందరు అధికారులు 12 గంటల తరువాతే కార్యాలయాలకు రావడం గమనార్హం.
12 గంటలైనా విధులకు హాజరు గాని వైనం
కార్యాలయాల వద్ద పడిగాపులు కాస్తున్న ప్రజలు
తాళ్లూరు, ఫిబ్రవరి 27 : మండల అధికారులు బొత్తిగా సమయపాలన పాటించడం లేదు. సోమవారం కొందరు అధికారులు 12 గంటల తరువాతే కార్యాలయాలకు రావడం గమనార్హం. ఎంపీడీవో సహా సిబ్బంది మద్దిపాడు, ఒంగోలు నగరంలో నివాసముంటూ రోజూ రాకపోకలు సాగిస్తున్నారు. ముఖ్యంగా ప్రజలకు అందుబాటులో ఉండాల్సిన సోమవారం కూడా యథాప్రకారం 12 గంట ల తర్వాతే విధులకు హాజరయ్యారు. వారంలో మూడు రోజులు మాత్రమే కార్యాలయంలో అందుబాటులో ఉంటున్నారన్న విమర్శలు వెల్లువెత్తుతున్నాయి. తహసీల్దార్‌ కార్యాలయంలోని సిబ్బంది కూడా ఇతర ప్రాంతాల్లో నివాసముంటూ విధులకు హాజరవుతున్నారు. సోమవారం తహసీల్దార్‌ 11.30 గంటలకు విధులకు హాజరుకాగా, డీటీ ఎలక్షన్‌ మీటింగ్‌కు వెళ్లగా, సీనియర్‌, జూనియర్‌ అసిస్టెంట్‌లు ఆఫీస్‌ పనులంటూ ఒంగోలు వెళ్లారు. దీంతో కార్యాలయంలో తహసీల్దార్‌, ఇద్దరు కాంట్రాక్ట్‌, అటెండర్లు మాత్రమే విధుల్లో ఉన్నారు. కొందరు ఉద్యోగులు ప్రతి రోజూ 11 గంటలు దాటిన తరువాతే విఽధులకు హాజరవుతున్నారు. కొందరు కార్యాలయాలకు రాకపోగా, క్యాంపులు, పర్యటనలంటూ కార్యాలయాలవైపు కన్నెత్తి చూడటం లేదన్న విమర్శలు వినవస్తున్నాయి. అధికారులు ఆలస్యంగా వస్తుండడంతో అవసరార్థులు వారి కోసం పడిగాపులు కాస్తున్నారు.
Updated Date - 2023-02-27T23:04:59+05:30 IST