1. • Home » Andhra Pradesh » West Godavari » natta rameswaram temple open

నేటి నుంచి నత్తా రామేశ్వరం రామలింగేశ్వర స్వామి దర్శనం

పెనుమంట్ర మండలం నత్తా రామేశ్వరం రామలింగేశ్వరస్వామి శుక్రవారం నుంచి భక్తులకు దర్శనం ఇవ్వనున్నారు.

పెనుగొండ, ఏప్రిల్‌ 20: పెనుమంట్ర మండలం నత్తా రామేశ్వరం రామలింగేశ్వరస్వామి శుక్రవారం నుంచి భక్తులకు దర్శనం ఇవ్వనున్నారు. సంవత్సరంలో 11 నెలలపాటు నీటిలోనే ఉండి వైశాఖ మాసంలో భక్తులకు దర్శనం ఇస్తారు. పరశురాముడు క్షత్రియలను సంహరించినపుడు ఆ దోష పరిహారార్థం ఇక్కడ గోస్తనీ నదీతీరంలో శివలింగాన్ని ప్రతిష్ఠించాడని పురాణాలు చెబుతున్నాయి. ఏడుకోట్ల మునులు, దేవ రుషులతో ఈ శివలింగాన్ని ప్రతిష్ఠించడంతో దీనికి సప్త కోటీశ్వర లింగమని పేరు. ఇక్కడ స్వామి పశ్చిమాభిముఖంగా ఉండడం విశిష్టత. చెరువులోని నీటిని తోడివేసి ఈ నెలరోజులూ స్వామివారికి అభిషేకాలు నిర్వహిస్తారు. స్వామివారి దర్శనానికి భక్తులు వివిధ ప్రాంతాల నుంచి వస్తుంటారు. భక్తులకు ఎటువంటి ఇబ్బందులు రాకుండా అన్ని ఏర్పాట్లు పూర్తి చేసినట్టు ఆలయ ఈవో శ్రీధర్‌ తెలిపారు. సోమవారం, పర్వదినాల్లో భక్తులకు అన్న సమారాధన నిర్వహిస్తున్నట్లు చెప్పారు.