నువ్వూ నేనూ కాలం
ABN, First Publish Date - 2023-10-16T01:40:22+05:30
నిన్ను చూసినప్పుడల్లా అమ్మ ఒడిలో కూర్చొని నాన్న కళ్ళలో తన బొమ్మ చూసి మురిసిపోతున్న పసిపాపలా కనిపిస్తావు...
1
నిన్ను చూసినప్పుడల్లా
అమ్మ ఒడిలో కూర్చొని
నాన్న కళ్ళలో తన బొమ్మ చూసి మురిసిపోతున్న
పసిపాపలా కనిపిస్తావు
2
నీతో ఆడుకోవాలనుకుంటాను
అప్పుడు నువ్వు నా నీడను
ఎక్కడో దాచి
నన్ను ఆట పట్టిస్తావు
3
నీ స్పర్శను మోసుకుంటూ నా ఆత్మ
అనంత సంచారంలో అలసిపోయి
కాలానికీ కాలానికీ మధ్య
విరామ చిహ్నంలా
విశ్రాంతి తీసుకుంటుంది
4
తేనెబొట్టు లాంటి నీ కంఠంపై
నా అధరాక్షరాల నిర్నిద్ర ముద్రల కవాతు
నా జన్మ జన్మల కవిత్వమవుతుంది
5
నేను నువ్వైన నాతో
ఒక చుంబనాలింగనం కోసం
నా జిహ్వాగ్రం మీద
ప్రపంచం వేలాడుతుంది
6
నువ్వు నన్ను
శూన్యాన్ని చేసి
గాలి రెప్పలతో రంగులు వేస్తావు
7
నీలో నాలో విశ్వమంతా
రెక్కల మనుషుల చుక్కల లోకమై
ఏటవాలు సంధ్యలో
కోటి రంగుల ఏటి కెరటాల పాటవుతుంది
8
ఇదంతా ఎవరి గురించి రాస్తున్నావు అని ఎవరైనా అడిగితే
బొట్టు బొట్టుగా యుగాలు యుగాలుగా
నాలోకి ఇంకిన నిన్ను చూపిస్తాను-
9
కవిత్వం అంటే
ఒక స్త్రీని ప్రసవించడమే
అని చెప్తాను
ప్రసాదమూర్తి
84998 66699
Updated Date - 2023-10-16T01:40:32+05:30 IST