Viral: కదులుతున్న ట్రక్‌ కింద మంచం ఏర్పాటు చేసి దానిపై నిద్ర! కునుకు కోసం ఇంత రిస్కా!
ABN, First Publish Date - 2023-09-24T19:32:01+05:30
కదులుతున్న ట్రక్‌ కింద మంచం ఏర్పాటు చేసి దానిపై నిద్రపోతున్న ఓ వ్యక్తి వీడియో నెట్టింట వైరల్‌గా మారింది. ఈ దృశ్యాన్ని చూసి జనాలు షాకయిపోతున్నారు.
ఇంటర్నెట్ డెస్క్: రహదారిపై ఓ భారీ కంటెయినర్ వేగంగా దూసుకెళుతోంది. దాన్ని మరో బైక్ ఓవర్ టేక్ చేసేందుకు ప్రయత్నిస్తోంది. ఇంతలో..బైక్ వెనకసీటుపై ఉన్న వ్యక్తికి కంటెయినర్ కింద ఊహించని దృశ్యం కనిపించింది. కంటెయినర్ కింద, సామాన్లుగట్రా పెట్టుకునేందుకు కొక్కేలతో కూడిన చిన్న జాగా ఉంది. దానిపై జాగ్రత్తగా అమర్చిన మంచంపై ఓ వ్యక్తి గాఢనిద్రలో కూరుకుపోయి కనిపించాడు. ఈ దృశ్యం చూసి బైక్‌పై ఉన్న వ్యక్తికి దిమ్మతిరిగినంత పనైంది. ఇందుకు సంబంధించిన ఉదంతం ప్రస్తుతం నెట్టింట వైరల్‌గా(Viral Video) మారింది.
అలాంటి ప్రమాదకర స్థితిలో నిద్రపోతున్న ఆ కార్మికుడిని చూసి అనేక మంది జాలిపడ్డారు. చిన్న కునుకు కోసం అంత రిస్క్ ఎందుకు తీసుకోవాల్సి వచ్చిందో చాలా మందికి అర్థం కాలేదు. అయితే, తమకు తెలిసిన మేరకు కొందరు సమాధానం చెప్పే ప్రయత్నం చేశారు. డ్రైవర్ క్యాబిన్‌లో కూర్చుంటే ఎండవేడి తట్టుకోలేడు కాబట్టే అలాంటి చోట విశ్రమించేందుకు నిర్ణయించుకున్నాడని కొందరు చెప్పుకొచ్చారు(Man sleeping in small compartment under moving truck).
ఈ దృశ్యాలపై మరికొందరు ఫన్నీగా రియాక్టయ్యారు. కంటెయినర్ చక్రాలు సరిగ్గా తిరుగుతున్నాయో లేదో చూసేందుకు అతడు అక్కడ మంచం వేసుకుని పడుకున్నాడని సెటైర్లు పేల్చారు. అయితే, చాలా మంది అతడి భద్రతపై ఆందోళన వ్యక్తం చేశారు. డ్రైవర్ సడెన్ బ్రేకు వేసిన సందర్భంలో అతడు తుళ్లి టైర్ల కింద పడితే మరణం తప్పదని అనేక మంది హెచ్చరించారు.
అయితే, ఈ అసాధారణ దృశ్యం నెట్టింట్లో అనేక మందిని ఆకట్టుకుంటోంది. పలువురిని భయాందోళనలకు గురిచేస్తోంది. దీంతో, ఈ వీడియో చూసిన వారు భారీ ఎత్తున స్పందిస్తూ కామెంట్స్ కుమ్మరిస్తున్నారు. విపరీతంగా వైరల్ అవుతున్న ఈ వీడియోకు ఇప్పటివరకూ 7 మిలియన్లకుపైగా వ్యూస్ వచ్చాయి.
Updated Date - 2023-09-24T19:32:03+05:30 IST