అమ్మాయి బాబాయిలే ప్రాణం తీశారు
ABN, First Publish Date - 2023-03-12T03:22:08+05:30
పాతబస్తీలో ఇటీవల జరిగిన డెగావత్‌ పవన్‌(22) అనే యువకుడి హత్యకు ప్రేమ వ్యవహారమే కారణమని పోలీసులు గుర్తించారు. పవన్‌ ప్రేమించిన యువతి బాబాయిలు గౌస్‌, సద్దాంలే ఈ హత్య చేశారని కనిపెట్టి నిందితులను అరెస్టు చేశారు.
పవన్‌ హత్య కేసులో ముగ్గురి అరెస్టు
పహాడిషరీఫ్‌ మార్చి 11 (ఆంధ్రజ్యోతి): పాతబస్తీలో ఇటీవల జరిగిన డెగావత్‌ పవన్‌(22) అనే యువకుడి హత్యకు ప్రేమ వ్యవహారమే కారణమని పోలీసులు గుర్తించారు. పవన్‌ ప్రేమించిన యువతి బాబాయిలు గౌస్‌, సద్దాంలే ఈ హత్య చేశారని కనిపెట్టి నిందితులను అరెస్టు చేశారు. బాలాపూర్‌ పీఎస్‌ పరిధిలో ఈ నెల 8న జరిగిన పవన్‌ హత్య కేసు వివరాలను పోలీసులు శనివారం వెల్లడించారు. పాతబస్తీలోని వాదియే ఉమర్‌ కాలనీలో నివాసముంటున్న పవన్‌.. వారి ఇంటి పక్కన ఉండే ఓ యువతి ప్రేమించుకున్నారు. ఈ విషయంలో యువతి కుటుంబసభ్యులు పవన్‌ కుటుంబీకులతో పలుమార్లు గొడవ పడ్డారు. అంతేకాక, పవన్‌కు దూరంగా ఉండాలని పహాడిషరీఫ్‌ ప్రాంతానికి మకాం మార్చారు. కానీ, పవన్‌, ఆ యువతి మధ్య ప్రేమాయణం కొనసాగింది. దీంతో తమ బిడ్డకు దూరంగా ఉండాలని పవన్‌ను ఆమె బాబాయిలు గౌస్‌, సద్దాం హెచ్చరించారు. ఎంజీఎం మీడియా ప్రతినిధి మహమ్మద్‌ మహమూద్‌ వద్ద పంచాయితీ పెట్టారు. పరిహారంగా యువతి కుటుంబానికి రూ.3లక్షలు చెల్లిస్తామని పవన్‌ కుటుంబసభ్యులు ఒప్పందం చేసుకున్నారు. ఆ తర్వాత కూడా పవన్‌, ఆ యువతి తీరు మారకపోవడంతో గౌస్‌, సద్దాం కక్ష పెంచుకున్నారు. మార్చి 8 రాత్రి 12 గంటల సమయంలో పవన్‌ మూత్రవిసర్జన కోసం ఇంటి బయటకు రాగానే కత్తులతో పొడిచి పరారయ్యారు. ఆస్పత్రికి తరలించే లోపే పవన్‌ కన్నుమూశాడు.
Updated Date - 2023-03-12T03:22:13+05:30 IST