కేక్‌.. కేక!
ABN, Publish Date - Jan 24 , 2024 | 03:03 AM
తెలుగుదేశం పార్టీ యువ నేత లోకేశ్‌ పుట్టిన రోజు వేడుకలను మంగళవారం ఆ పార్టీ నేతలు కనీవినీ ఎరుగని రీతిలో నిర్వహించారు.
లోకేశ్‌ పుట్టిన రోజుకు 1100 కిలోల భారీ కేక్‌
లారీపైనే కట్‌ చేసి సంబరాలు
టీడీపీ కేంద్ర కార్యాలయంలో ఘనంగా వేడుకలు
అమరావతి, జనవరి 23 (ఆంధ్రజ్యోతి): తెలుగుదేశం పార్టీ యువ నేత లోకేశ్‌ పుట్టిన రోజు వేడుకలను మంగళవారం ఆ పార్టీ నేతలు కనీవినీ ఎరుగని రీతిలో నిర్వహించారు. ఏకంగా 1100కిలోల కేక్‌ తయారు చేయించి, ఒక లారీపై పెట్టి ఇక్కడి తమ పార్టీ కేంద్ర కార్యాలయానికి చేర్చారు. పార్టీ నేత కొమ్మారెడ్డి కిరణ్‌ దీనిని తయారు చేయించారు. అంత భారీ కేక్‌ను కిందికి దించే అవకాశం లేకపోవడంతో.. పార్టీ ముఖ్య నేతలు కిమిడి కళా వెంకట్రావు, ధూళిపాళ్ల నరేంద్ర కుమార్‌, నక్కా ఆనందబాబు, పర్చూరి అశోక్‌ బాబు, కాల్వ శ్రీనివాసులు, ఎంఎ షరీఫ్‌ లారీ పైకి ఎక్కి దానిని కట్‌ చేసి పార్టీ కార్యకర్తలకు పంచారు. టీఎన్‌ఎ్‌సఎఫ్‌ నేత రేపాకుల శ్రీనివాస్‌ విజయవాడ ఎన్టీఆర్‌ సర్కిల్‌ నుంచి కార్ల ర్యాలీ జరిపారు. పార్టీ కేంద్ర కార్యాలయంలో 30 కిలోల కేక్‌ కట్‌ చేసి పంచారు. పార్టీ బీసీ సెల్‌, తెలుగు యువత ఆధ్వర్యంలో వేర్వేరుగా భారీ కేక్‌లు కట్‌ చేశారు. టీడీపీ రాష్ట్ర కార్యదర్శి కనపర్తి శ్రీనివాసరావు, తెలుగు యువత రాష్ట్ర అధ్యక్షుడు శ్రీరాంచినబాబు తదితరులు పాల్గొన్నారు. అలాగే, అమెరికాలోని న్యూయార్క్‌లోని టైమ్‌ స్క్వేర్‌ వద్ద మన్నవ మోహనకృష్ణ యూత్‌.. లోకేశ్‌ జన్మదిన వేడుకలు నిర్వహించింది. హైదరాబాద్‌ ఎన్టీఆర్‌ భవన్‌లో జరిగిన వేడుకల్లో బక్కని నర్సింలు, తాడికొండ ఎమ్మెల్యే ఉండవల్లి శ్రీదేవి, నన్నూరి నర్సిరెడ్డి తదితరులు పాల్గొన్నారు.
లోకేశ్‌కు పవన్‌ శుభాకాంక్షలు
లోకేశ్‌కు జనసేన అధినేత పవన్‌ కల్యాణ్‌ హృదయపూర్వక జన్మదిన శుభాకాంక్షలు తెలిపారు. లోకేశ్‌కు సంపూర్ణ ఆయురారోగ్యాలు, సుఖ సంతోషాలను భగవంతుడు అందించాలని పవన్‌ ఆకాంక్షించారు.
Updated Date - Jan 24 , 2024 | 03:03 AM
