TS News: తెలంగాణ కాంగ్రెస్‌కు మరో షాక్?
ABN, First Publish Date - 2022-11-14T11:01:40+05:30
తెలంగాణ కాంగ్రెస్‌కు మరో షాక్ తగలబోతోంది. నిర్మల్ జిల్లా కాంగ్రెస్ అధ్యక్షుడు రామారావు పాటిల్ బీజేపీలో చేరబోతున్నారు.
హైదరాబాద్: తెలంగాణ కాంగ్రెస్‌కు మరో షాక్ తగలబోతోంది. నిర్మల్ జిల్లా కాంగ్రెస్ అధ్యక్షుడు రామారావు పాటిల్ బీజేపీలో చేరబోతున్నారు. కొద్ది రోజులుగా బీజేపీ ముఖ్యనేతలతో సంప్రదింపులు జరుపుతున్న రామారావు.. కమలం గూటికి చేరేందుకు రంగం సిద్ధం చేస్తున్నారు. సోమవారం బైంసాలో తన అనుచరులతో జరిపే సమావేశంలో పార్టీ మార్పుపై ప్రకటన చేయనున్నారు.
బీజేపీ నుంచి ఆహ్వానం అందినప్పటి నుంచి కాంగ్రెస్ పార్టీ కార్యకర్తలు, అనుచరులతో రామారావు అభిప్రాయ సేకరణ జరుపుతున్నారు. స్థానిక బీజేపీ, హిందూ సంఘాల నేతలతోనూ ఆయన సమావేశాలు నిర్వహిస్తున్నారు. 2018 ఎన్నికల్లో రామారావు పాటిల్ ముథోల్ నుంచి కాంగ్రెస్ అభ్యర్థిగా పోటీ చేసి ఓడిపోయారు. ఆ తర్వాత జిల్లా పార్టీ అధ్యక్షుడిగా నియామకమయ్యారు. బీజేపీలో చేరే విషయంలో కార్యకర్తల అభిప్రాయం మేరకు భవిష్యత్ కార్యాచరణ రూపొందిస్తానని చెప్పడం ప్రాధాన్యత సంతరించుకుంది. ఈ నెల 28న బీజేపీలో చేరేందుకు ముహూర్తం ఖరారు చేసుకున్నట్లు సమాచారం.
Updated Date - 2022-11-14T11:01:52+05:30 IST