Krishna: పబ్లిక్‌లో కొట్టుకున్న ఇద్దరు ప్రభుత్వ ఉద్యోగులు.. ఏం జరిగిందంటే..
ABN, First Publish Date - 2023-03-20T19:40:31+05:30
గుడివాడ రైల్వేస్టేషన్‌(Gudiwada Railway Station)లో ఓ మహిళా కానిస్టేబుల్(Lady Constable), వీఆర్వో(VRO) బాహాబాహికి దిగారు.
Krishna: గుడివాడ రైల్వేస్టేషన్‌(Gudiwada Railway Station)లో ఓ మహిళా కానిస్టేబుల్(Lady Constable), వీఆర్వో(VRO) బాహాబాహికి దిగారు. అంగన్‌వాడీల ఛలో అసెంబ్లీకి వెళ్తున్న అంగన్‌వాడీ (Anganwadi) కార్యకర్త తన భర్తతో రైల్వేస్టేషన్‌కు రాగా మహిళా కానిస్టేబుల్ అడ్డుకోవడంతో వాగ్వాదం కొట్టుకునే స్థాయికి వెళ్లింది. తన భార్యను రైలు ఎక్కించేందుకు వచ్చిన వీఆర్వో చేయిని కొరకగా.. వీఆర్వో ఆ మహిళా కానిస్టేబుల్ చెంప ఛెల్లుమనిపించాడు.
వివరాల్లోకి వెళితే..ఆంధ్రప్రదేశ్‌లోని అంగన్‌వాడీలు నేడు చలో విజయవాడ(Vijayawada)కు పిలుపునిచ్చిన సంగతి తెలిసిందే. రాష్ట్రంలో అంగన్‌వాడీల సమస్యలను పరిష్కరించాలని డిమాండ్‌ చేస్తూ అంగన్‌వాడీ వర్కర్స్‌ అండ్‌ హెల్పర్స్‌ యూనియన్‌ ఈ కార్యక్రమానికి పిలుపునిచ్చింది. దీంతో పలు జిల్లాల నుంచి అంగన్‌వాడీ కార్యకర్తలు విజయవాడకు వస్తున్న సమయంలో గుడివాడ రైల్వే స్టేషన్‌లో ఈ ఘటన చోటు చేసుకుంది.
అంగన్‌వాడీ కార్యకర్త అయిన తన భార్యను రైలు ఎక్కించేందుకు గుడివాడ రైల్వే స్టేషన్‌కు వీఆర్వో అనిల్ వచ్చారు. అక్కడే విధులు నిర్వహిస్తున్న మహిళా కానిస్టేబుల్ రమాదేవి ‘‘ఛలో అసెంబ్లీకి వెళ్తున్నావా’’ అంటూ వారిని అడ్డుకోవడంతో అనిల్ మహిళా కానిస్టేబుల్‌తో వాగ్వాదానికి దిగారు. అనిల్, అతని భార్యను అడ్డుకునే ప్రయత్నంలో మహిళా కానిస్టేబుల్ అనిల్ చేయి కొరికింది. దీంతో అనిల్ ఆమె చెంపపై కొట్టడంతో గొడవ పెరిగింది. ఇద్దరు ప్రభుత్వ ఉద్యోగులు పబ్లిక్‌లో కొట్టుకోవడంతో ఈ దృశ్యం చూస్తున్న ప్రయాణికులు నిర్ఘాంతపోయారు.
Updated Date - 2023-03-20T19:47:35+05:30 IST