Yuvagalam: తిరుపతి జిల్లాలో రెండవ విడత ‘యువగళం’
ABN, First Publish Date - 2023-06-19T21:55:22+05:30
టీడీపీ జాతీయ ప్రధాన కార్యదర్శి నారా లోకేశ్‌ (Nara Lokesh) చేపట్టిన యువగళం పాదయాత్ర (Yuvagalam Padayatra) మంగళవారం రాత్రి నుంచీ తిరుపతి జిల్లా (Tirupati District)లో రెండవ విడత ప్రారంభం కానుంది.
తిరుపతి: టీడీపీ జాతీయ ప్రధాన కార్యదర్శి నారా లోకేశ్‌ (Nara Lokesh) చేపట్టిన యువగళం పాదయాత్ర (Yuvagalam Padayatra) మంగళవారం రాత్రి నుంచీ తిరుపతి జిల్లా (Tirupati District)లో రెండవ విడత ప్రారంభం కానుంది. తొలి విడతలో ఆయన గత ఫిబ్రవరి 12 నుంచీ మార్చి 2 వరకూ తిరుపతి జిల్లాలో మొదటి విడత పాదయాత్ర చేపట్టారు. అప్పట్లో 13 రోజుల పాటు జిల్లాలోని నగరి, సత్యవేడు, శ్రీకాళహస్తి, తిరుపతి, చంద్రగిరి నియోజకవర్గాల్లో పర్యటించి 203 కిలోమీటర్ల మేరకు పాదయాత్ర సాగించి ప్రజలను కలుసుకున్నారు. పాదయాత్ర 32వ రోజైన గత మార్చి 2న జిల్లాలో పర్యటన ముగించిన లోకేశ్‌ సరిగ్గా వంద రోజుల తర్వాత 132వ రోజైన నేడు రెండో విడత జిల్లాలో పాదయాత్ర ప్రారంభించనున్నారు. మంగళవారం రాత్రి 8 గంటలకు వెంకటగిరి నియోజకవర్గం డక్కిలి మండలం మాధవాయపాలెం చేరుకోవడంతో జిల్లాలో పాదయాత్ర మొదలు కానుంది. ఆ మేరకు తిరుపతి జిల్లా పార్టీ నేతలు, శ్రేణులు ఆయనకు భారీ ఎత్తున స్వాగతం పలికేందుకు సన్నద్ధమవుతున్నారు. వెంకటగిరి నియోజకవర్గం తర్వాత సూళ్లూరుపేట, గూడూరు నియోజకవర్గాల మీదుగా ఆయన తిరిగి నెల్లూరు జిల్లా వెళ్లనున్నారు.
Updated Date - 2023-06-19T21:55:22+05:30 IST