Former Chief Minister: బీజేపీకి ఇక ఆ అస్త్రం పనిచేయదు..
ABN, First Publish Date - 2023-03-04T10:14:35+05:30
ఈ ఎన్నికల్లో బీజేపీ లింగాయత్‌ అస్త్రం ఇక పనిచేయదని జేడీఎఎస్‌ నేత, మాజీ ముఖ్యమం
బెంగళూరు, (ఆంధ్రజ్యోతి): ఈ ఎన్నికల్లో బీజేపీ లింగాయత్‌ అస్త్రం ఇక పనిచేయదని జేడీఎఎస్‌ నేత, మాజీ ముఖ్యమంత్రి హెచ్‌డీ కుమారస్వామి(Former Chief Minister HD Kumaraswamy) పేర్కొన్నారు. మైసూరులో శుక్రవారం ఆయన మీడియాతో మాట్లాడుతూ ఈ నిజాన్ని గ్రహించినందునే నిన్నటి వరకు యడియూరప్పను అడుగడుగునా అవమానాలకు గురిచేసిన ప్రధాని నేడు ఆయనను కౌగలించుకుంటున్నారన్నారు. సీఎంగా ఉన్న సమయంలో యడియూరప్ప ఢిల్లీకి వెళ్లినపుడల్లా ఆయనకు అపాయింట్‌మెంట్‌ ఇవ్వకుండా ప్రధాని మోదీ(Prime Minister Modi), హోంశాఖ మంత్రి అమిత్‌షా పదే పదే అవమానించారని గుర్తుచేశారు. ఇప్పుడు లింగాయత్‌ ఓట్ల కోసమే యడియూరప్పను ప్రధాని పదేపదే ప్రశంసలతో ఆకాశానికెత్తుతున్నారన్న చేదు నిజాన్ని ఈ కులం ప్రజలు బాగా అర్థం చేసుకున్నారన్నారు. యడియూరప్పను వాడుకుని వదిలేయడం బీజేపీకి వెన్నతో పెట్టిన విద్య అని తెలుసుకున్నారని కుమారస్వామి పేర్కొన్నారు. పంచమసాలి స్వామిజీతో 800 కిలోమీటర్లు నడిపించిన పాపం బీజేపీ ప్రభుత్వానిదేనన్నారు. ఈ పాపం బీజేపీని ఊరికే వదలదన్నారు. బీజేపీపై లింగాయత్‌లు తీవ్ర ఆగ్రహంతో ఉన్నారని త్వరలో జరిగే శాసనసభ ఎన్నికల్లో ఆ పార్టీకి గట్టిగా బుద్ధి చెప్పే సన్నాహాల్లో ఉన్నారన్నారు. తమ పార్టీ ఎవరికీ బీ-టీమ్‌ కాదని స్పష్టం చేసిన ఆయన శాసనసభ ఎన్నికల్లో ఒంటరిగానే బరిలోకి దిగి సత్తా చాటుకుంటామన్నారు. బీజేపీ-కాంగ్రెస్కు సమానదూరం పాటించాలన్న నిర్ణయాన్ని ఎట్టి పరిస్ధితిలోనూ ఉల్లంఘించే ప్రశ్నేలేదన్నారు.
Updated Date - 2023-03-04T10:14:35+05:30 IST