Former CM: మాజీ సీఎం సంచలన కామెంట్స్.. మా అభ్యర్థులకు నగదు అంటూ ఆయన చేసిన వ్యాఖ్యలు ఇప్పుడు..
ABN, First Publish Date - 2023-05-11T12:58:33+05:30
మాజీ ముఖ్యమంత్రి కుమారస్వామి సంచలన వ్యాఖ్యలు చేశారు. మా అభ్యర్థులకు నగదు అంటూ ఆయన చేసిన వ్యాఖ్యలు ఇప్పుడు..
బెంగళూరు, (ఆంధ్రజ్యోతి): జేడీఎస్‌ నుంచి పోటీ చేసిన అభ్యర్థులకు కనీస అవసరాలకు నగదు ఇవ్వలేకపోయానని ఆ పార్టీ సీనియర్‌ నేత, మాజీ సీఎం కుమారస్వామి(Former CM Kumaraswamy) విచారం వ్యక్తం చేశారు. రామనగర జిల్లా కేతగానహళ్లిలో ఆయన మీడియాతో మాట్లాడుతూ... కొందరు అభ్యర్థులు సునాయాసంగా గెలిచేవారని, వారికి కొంత సాయం చేయాల్సి ఉండేదన్నారు. లేనిపక్షంలో జేడీఎస్‌ తరపున మరిన్ని సీట్లు పెరిగేవన్నారు. కాంగ్రెస్‌, బీజేపీ ఆర్థిక బలంతో ఎన్నికల్లోకి వెళ్లారన్నారు. రాష్ట్రంలో హంగ్‌ ఏర్పడనుందా..? అనే ప్రశ్నకు సమాధానం దాటవేశారు. రెండు రోజుల తర్వాత ఫలితాలు వస్తాయని అప్పటిదాకా మాట్లాడేది లేదన్నారు. ఇదే సందర్భంగా రామనగర అభ్యర్థి నిఖిల్‌కుమారస్వామి మీడియాతో మాట్లాడుతూ ప్రస్తుత ఎన్నికలు ఆర్థికబలంతో సాగాయన్నారు. ఓ యువకుడిగా తాను ఆవేదన వ్యక్తం చేస్తున్నా అన్నారు. వ్యవస్థలో మార్పు రావాలని, అందుకు ప్రజలు తగిన నిర్ణయాలు తీసుకోవాల్సి ఉంటుందన్నారు. రామనగర(Ramanagara) జిల్లాలో మూడు చోట్ల విజయం సాధిస్తామని విశ్వాసాన్ని వ్యక్తం చేశారు. కుమారస్వామి, భార్య అనితా, కుమారుడు నిఖిల్‌, కోడలు రేవతి నిఖిల్‌ కేతగానహళ్లిలో బుధవారం ఓటు హక్కు వినియోగించుకున్నారు.
Updated Date - 2023-05-11T12:58:33+05:30 IST