Cryptocurrency : క్రిప్టో కరెన్సీపై మోదీ వ్యాఖ్యలు
ABN, First Publish Date - 2023-08-27T15:03:03+05:30
వ్యాపార సంస్థలు-వినియోగదారుల మధ్య నమ్మకం బలంగా ఉండాలని ప్రధాన మంత్రి నరేంద్ర మోదీ చెప్పారు. వినియోగదారుల హక్కుల పట్ల సంబరపడటం కన్నా వినియోగదారుల సంరక్షణ పట్ల దృష్టి సారించాలని వ్యాపారవేత్తలకు పిలుపునిచ్చారు.
న్యూఢిల్లీ : వ్యాపార సంస్థలు-వినియోగదారుల మధ్య నమ్మకం బలంగా ఉండాలని ప్రధాన మంత్రి నరేంద్ర మోదీ (Prime Minister Narendra Modi) చెప్పారు. వినియోగదారుల హక్కుల పట్ల సంబరపడటం కన్నా వినియోగదారుల సంరక్షణ పట్ల దృష్టి సారించాలని వ్యాపారవేత్తలకు పిలుపునిచ్చారు. క్రిప్టోకరెన్సీలకు సంబంధించిన సమస్యలను పరిష్కరించుకోవడానికి సమగ్ర, ఏకీకృత వైఖరి ఉండాలన్నారు. బీ20 వ్యాపార సదస్సును ఉద్దేశించి ఆయన ఆదివారం మాట్లాడారు.
‘‘వినియోగదారుల పరిరక్షణ గురించి మనం మాట్లాడగలమా? అది సకారాత్మక (positve) సంకేతాలను పంపిస్తుంది, వినియోగదారుల హక్కుల సమస్యలను పరిష్కరిస్తుంది. మనం వ్యాపార సంస్థలు-వినియోగదారుల మధ్య నమ్మకాన్ని పెంపొందించాలి’’ అని మోదీ చెప్పారు. అంతర్జాతీయ వినియోగదారుల పరిరక్షణ దినోత్సవాన్ని ఏదో ఓ రోజున జరుపుకోవాలని సూచించారు.
క్రిప్టోకరెన్సీలకు సంబంధించిన సమస్యలను పరిష్కరించేందుకు సమగ్ర, ఏకీకృత వైఖరి అవసరమని తెలిపారు. ఉత్పత్తిదారులు, వినియోగదారుల ప్రయోజనాల మధ్య సమతుల్యత ఉన్నపుడే లాభదాయక మార్కెట్ సుస్థిరమవుతుందని చెప్పారు. ఇతర దేశాలను కేవలం మార్కెట్లుగా పరిగణించడం వల్ల ప్రయోజనం ఉండదని, అలా చూడటం వల్ల ఉత్పత్తిదారులైన దేశాలకు నేడో, రేపో హాని జరుగుతుందని తెలిపారు. అభివృద్ధిలో అందరినీ సమాన భాగస్వాములను చేయడం మన ముందు ఉన్న మార్గమని చెప్పారు. మరింత ఎక్కువగా వినియోగదారుల కేంద్రంగా వ్యాపారం జరిగే విధంగా వ్యాపారాన్ని తీర్చిదిద్దడం ఎలాగో మనమంతా చెప్పగలమా? అని ప్రశ్నించారు.
‘‘మీరు (వ్యాపారులు) ప్రజలంతా పండుగ ఉత్సాహంతో ఉన్నపుడు భారత దేశానికి వచ్చారు. ఈసారి భారత దేశంలో పండుగల సీజన్ ఆగస్టు 23 నుంచి ప్రారంభమైంది. చంద్రుని ఉపరితలంపైకి చంద్రయాన్-3 దిగినందుకు ఈ సంబరాలు జరుగుతున్నాయి. భారత దేశ లూనార్ మిషన్ (చంద్రయాన్) విజయవంతమవడంలో ఇస్రో ప్రధాన పాత్ర పోషించింది. అంతేకాకుండా భారత దేశంలోని పరిశ్రమలు, ఎంఎస్ఎంఈలు, ప్రైవేట్ కంపెనీలు కూడా చాలా ముఖ్యమైన పాత్రను పోషించాయి. ఇది సైన్స్, పారిశ్రామిక రంగం సాధించిన విజయం’’ అని మోదీ చెప్పారు.
భారత దేశానికి సమ్మిళితత్వ విజన్ ఉందని, అందుకే జీ20 సదస్సుకు ఆఫ్రికా దేశాలను ఆహ్వానించామని చెప్పారు. భారత దేశంలో ప్రతిభావంతులైన యువత అత్యధికంగా ఉందన్నారు. ఇండస్ట్రీ 4.0 సమయంలో డిజిటల్ విప్లవానికి భారత దేశం నాయకత్వం వహిస్తోందన్నారు. సామర్థ్యాన్ని సౌభాగ్యంగా, అడ్డంకులను అవకాశాలుగా, ఆకాంక్షలను విజయాలుగా మార్చే సత్తా వ్యాపార రంగానికి ఉందని చెప్పారు. వ్యాపారం చిన్నదైనా, పెద్దదైనా; స్థానిక లేదా అంతర్జాతీయ స్థాయిలో జరిగేది అయినా, ప్రతి ఒక్కరినీ అభివృద్ధి చేస్తుందన్నారు.
సమర్థవంతమైన ప్రపంచ సరఫరా వ్యవస్థల్లో భారత దేశ పాత్ర గురించి మాట్లాడుతూ, గ్లోబల్ సప్లయ్ చైన్‌ను ప్రపంచం ఒకే విధంగా చూడటం సాధ్యం కాదన్నారు. అవసరమైనపుడు అంతరాయాలు ఏర్పడే సరఫరా వ్యవస్థను సమగ్ర వ్యవస్థగా పిలవగలమా? అని ప్రశ్నించారు. ఈ సమస్యకు పరిష్కారం భారత దేశమేనని చెప్పారు.
భారత దేశంలో హరిత ఇంధనంపై దృష్టి సారించామన్నారు. సౌర విద్యుత్తు, ఇంధన రంగాల్లో సాధించిన విజయాలను గ్రీన్ హైడ్రోజన్ రంగంలో కూడా పునరావ‌‌ృతం చేయాలని లక్ష్యంగా పెట్టుకున్నామని తెలిపారు. అన్ని దేశాలను కలుపుకొనిపోవాలని భారత దేశం కోరుకుంటోందని, అంతర్జాతీయ సౌర కూటమి రూపంలో అది ప్రతిఫలిస్తోందని చెప్పారు.
ఇవి కూడా చదవండి :
2024 Lok Sabha elections : మా ప్రధాన మంత్రి అభ్యర్థి రాహుల్ గాంధీ : అశోక్ గెహ్లాట్
Britain : భారత్ ఎదుగుదలపై బ్రిటన్ దౌత్యవేత్త వ్యాఖ్యలు
Updated Date - 2023-08-27T15:03:03+05:30 IST