Geetha Shivarajkumar: కాంగ్రెస్‌లో చేరిన కన్నడ కంఠీరవ రాజ్‌కుమార్‌ కోడలు
ABN, First Publish Date - 2023-04-28T21:48:36+05:30
కన్నడ కంఠీరవ రాజ్‌కుమార్‌ (Raj Kumar) కోడలు, మాజీ సీఎం బంగారప్ప కూతురు గీతా
బెంగళూరు: కన్నడ కంఠీరవ రాజ్‌కుమార్‌ (Raj Kumar) కోడలు, మాజీ సీఎం బంగారప్ప కూతురు గీతా శివరాజ్‌కుమార్‌ (Geetha Shivarajkumar) కాంగ్రెస్‌ పార్టీలో చేరారు. కేపీసీసీ (KPCC)లో శుక్రవారం జరిగిన ప్రత్యేక కార్యక్రమంలో గీతా శివరాజ్‌ కుమార్‌కు పార్టీ రాష్ట్ర అధ్యక్షుడు డీకే శివకుమార్‌.. కాంగ్రెస్‌ కండువా కప్పి సాదరంగా స్వాగతించారు.
హ్యాట్రిక్‌ హీరో శివరాజ్‌కుమార్‌ భార్య గీత కాంగ్రెస్‌ పార్టీలో చేరడం సర్వత్రా చర్చనీయాంశమైంది. శివమొగ్గ జిల్లా సొరబ నుంచి కాంగ్రెస్‌ అభ్యర్థిగా ఆమె తమ్ముడు మధు బంగారప్ప పోటీ చేస్తున్నారు. కాంగ్రెస్‌లో చేరాక గీత మాట్లాడుతూ, తన తమ్ముడు ఏ పార్టీలో ఉంటే తాను అక్కడే ఉంటానని పేర్కొన్నారు. వెంటనే ప్రచారానికి వెళతానని తెలిపారు.
తన తండ్రి బంగారప్పను ముఖ్యమంత్రి చేసిన కాంగ్రెస్‌లో చేరడం సంతోషంగా ఉందని అన్నారు. సొరబ నియోజకవర్గ వ్యాప్తంగా తిరిగి ప్రచారం చేస్తానని చెప్పారు. భర్త శివరాజ్‌కుమార్‌ సినిమా షూటింగ్‌లో ఉన్నారని, అది ముగియగానే ప్రచారానికి వస్తారని తెలిపారు.
డీకే శివకుమార్‌ మాట్లాడుతూ, ఎన్నోరోజులు ప్రయత్నిస్తే మధుబంగారప్ప కాంగ్రెస్‌లో చేరారని, ప్రస్తుతం ఆయన సోదరి గీత రావడం సంతోషంగా ఉందని అన్నారు. మాజీ ముఖ్యమంత్రి బంగారప్పకు ఇద్దరు కుమారులు కాగా, పెద్దకుమారుడు కుమార బంగారప్ప(సిట్టింగ్‌ ఎమ్మెల్యే) సొరబ నుంచి బీజేపీ అభ్యర్థి బరిలో ఉన్నారు. రెండో కుమారుడు మధు బంగారప్ప.. కాంగ్రెస్‌ నుంచి పోటీ చేస్తున్నారు. అన్నదమ్ముల మధ్య జరుగుతున్న ఈ పోటీలో మధు బంగారప్పకు అక్క గీత మద్దతు ఇస్తున్నారు.
Updated Date - 2023-04-28T21:48:36+05:30 IST