Kane Williamson: రాస్ టేలర్ రికార్డును బద్దలుగొట్టిన విలియమ్సన్.. టేలర్ రియాక్షన్ ఇదీ!
ABN, First Publish Date - 2023-02-27T21:42:30+05:30
ఇంగ్లండ్‌తో రెండో టెస్టులో న్యూజిలాండ్ స్టార్ బ్యాటర్ కేన్ విలియమ్సన్ (Kane Williamson) సరికొత్త
వెల్లింగ్టన్: ఇంగ్లండ్‌తో రెండో టెస్టులో న్యూజిలాండ్ స్టార్ బ్యాటర్ కేన్ విలియమ్సన్ (Kane Williamson) సరికొత్త రికార్డు సృష్టించాడు. జట్టు మాజీ కెప్టెన్ రాస్ టేలర్(Ross Taylor) రికార్డును అధిగమించి టెస్టుల్లో అత్యధిక పరుగులు సాధించిన కివీస్ ఆటగాడిగా రికార్డులకెక్కాడు. 25 పరుగుల వ్యక్తిగత స్కోరుతో నాలుగో రోజు ఇన్నింగ్స్‌ను ప్రారంభించిన విలియమ్సన్(Kane Williamson) ఫోర్ కొట్టి రాస్ టేలర్ (7,683) రికార్డును అధిగమించి టెస్టుల్లో అత్యధిక పరుగుల చేసిన కివీస్ క్రికెటర్‌గా రికార్డులకెక్కాడు.
తన రికార్డును విలియమ్సన్ అధిగమించడంపై టేలర్(Ross Taylor) స్పందించాడు. రెడ్ బాల్ క్రికెట్లో అతడి కృషి, అంకితభావానికి ఈ రికార్డు నిదర్శనమని కొనియాడాడు. టెస్టుల్లో అత్యధిక పరుగులు సాధించిన కివీస్ క్రికెటర్‌గా రికార్డు సాధించినందుకు అభినందనలు తెలుపుకుంటున్నట్టు చెప్పాడు. టెస్టు క్రికెట్లో విలియమ్సన్ కృషి, పట్టుదలకు అది నిదర్శనమన్నాడు. మరిన్ని రికార్డులు అందుకోవాలని ఆకాంక్షించాడు.
కాగా, న్యూజిలాండ్ తొలి ఇన్నింగ్స్‌లో నాలుగు పరుగులు మాత్రమే చేసిన విలియమ్సన్ రెండో ఇన్నింగ్స్‌లో భారీ సెంచరీ (132 పరుగులు) సాధించాడు. లాథమ్ 83, కాన్వే 61, డరిల్ మిచెల్ 54, టామ్ బ్లండెల్ 90 పరుగులు చేశారు. ఫలితంగా న్యూజిలాండ్ 483 పరుగులు చేసింది. అనంతరం నాలుగో రోజు ఆట ముగిసే సమయానికి ఇంగ్లండ్ వికెట్ నష్టానికి 48 పరుగులు చేసింది. ఈ టెస్టులో ఇంగ్లండ్ విజయం సాధించాలంటే ఇంకా 210 పరుగులు కావాలి. చేతిలో 9 వికెట్లు ఉన్నాయి.
Updated Date - 2023-02-27T21:42:32+05:30 IST