CM Revanth: ముఖ్యమంత్రి రెండో సంతకం దేనిపై అంటే?
ABN, First Publish Date - 2023-12-07T14:24:21+05:30
సీఎం రేవంత్ రెడ్డి తన ప్రమాణ స్వీకార అనంతరం మొదటి సంతకాన్ని 6 గ్యారంటీ హామీల అమలుపై చేయగా.. రెండో సంతకాన్ని దివ్యాంగురాలు రజనీ సంబంధించిన ప్రభుత్వ ఉద్యోగ నియామకపత్రంపై చేశారు.
హైదరాబాద్: సీఎం రేవంత్ రెడ్డి తన ప్రమాణ స్వీకార అనంతరం మొదటి సంతకాన్ని 6 గ్యారంటీ హామీల అమలుపై చేయగా.. రెండో సంతకాన్ని దివ్యాంగురాలు రజనీ సంబంధించిన ప్రభుత్వ ఉద్యోగ నియామకపత్రంపై చేశారు. హైదరాబాద్‌కు చెందిన దివ్యాంగురాలు రజనీని రేవంత్‌రెడ్డి తన ప్రమాణస్వీకారోత్సవానికి ఆహ్వానించారు.
రేవంత్ సీఎంగా ప్రమాణం చేశాక తొలి ఉద్యోగం రజనీకే ఇస్తానని మాట ఇచ్చి నిలబెట్టుకున్నారు. నాంపల్లి నియోజకవర్గం బోయిగూడ కమాన్‌ ప్రాంతానికి చెందిన రజినీ అక్టోబరు 17న గాంధీభవన్‌లో రేవంత్‌రెడ్డిని కలిశారు.
దివ్యాంగురాలిని కావడంతో తనకు ఉద్యోగం లభించడం లేదని, ఆర్థికంగా తీవ్ర ఇబ్బందులు పడుతున్నానని, ఉద్యోగం ఇప్పించాలని విజ్ఞప్తి చేశారు. రజినీ, ఆమె కుటుంబసభ్యుల వివరాలు అడిగి తెలుసుకున్న రేవంత్‌రెడ్డి కాంగ్రెస్‌ పార్టీ 6 గ్యారెంటీల కార్డును సంతకం చేసి ఇచ్చారు. తాను సీఎం అయ్యాక తొలి ఉద్యోగం రజనీకే ఇస్తానని హామీ ఇచ్చారు.
రేవంత్ ఆహ్వానంపై స్పందిస్తూ.. ఇచ్చిన మాట ప్రకారం ప్రమాణ స్వీకారం తర్వాత రేవంత్‌రెడ్డి తనకే తొలి ఉద్యోగం ఇస్తారని ఆశిస్తున్నట్లు గతంలో రజనీ చెప్పారు. ఇప్పటివరకు ఎంతో మంది నాయకులను కలిశానని, ఫలితం లేదని తెలిపారు. తన పీజీ పూర్తై 11సంవత్సరాలు గడిచిందని తెలిపారు. ఈ క్రమంలో సీఎం రేవంత్ తనకు ఉద్యోగం ఇవ్వడంపై హర్షాతిరేకాలు వ్యక్తం చేశారు.
Updated Date - 2023-12-07T14:25:32+05:30 IST