Hyderabad: వరుస అగ్నిప్రమాదాలు.. ఆందోళనలో ప్రజలు
ABN, First Publish Date - 2023-08-02T09:32:55+05:30
హైదరాబాద్, రంగారెడ్డి జిల్లాలో వరుస అగ్నిప్రమాదాలు ఆందోళన కలిగిస్తున్నాయి.
రంగారెడ్డి: హైదరాబాద్, రంగారెడ్డి జిల్లాలో వరుస అగ్నిప్రమాదాలు ఆందోళన కలిగిస్తున్నాయి. హైదరాబాద్ హబ్సిగూడలోని అన్ లిమిటెడ్ బార్ అండ్ రెస్టారెంట్‌లో ఘోర అగ్ని ప్రమాదం చోటు చేసుకోగా.. ఇటు అత్తాపూర్ హసన్‌నగర్‌లో మరో భారీ అగ్నిప్రమాదం సంభవించింది. ఓ బట్టల గోదాంలో పెద్దఎత్తున మంటలు చెలరేగాయి. దట్టమైన పొగ వ్యాపించడంతో స్థానికులు ఉక్కిరి బిక్కిరి అవుతున్న పరిస్థితి. సమాచారం అందిన వెంటనే అగ్నిమాపక సిబ్బంది అక్కడకు చేరుకుని మంటలు ఆర్పేందుకు యత్నిస్తున్నారు. రెండు ఫ్లోర్లలో మంటలు అంటుకున్నాయి. ఈ ఘటనలో భారీగా ఆస్తి నష్టం వాటిల్లింది. కాగా.. పక్క ఉన్న ఇండ్లకు వ్యాపించకుండా అగ్నిమాపక సిబ్బంది జాగ్రత్త చర్యలు తీసుకుంటున్నారు.
మరోవైపు హబ్సిగూడలోని అన్ లిమిటెడ్ బార్ అండ్ రెస్టారెంట్, రేమండ్ షోరూం బిల్డింగ్ పైన ప్రమాదవశాత్తు అగ్ని ప్రమాదం చోటు చేసుకుంది. దీంతో మంటలు ఎగిసిపడుతున్నాయి. వెంటనే స్థానికులు అగ్నిమాపక సిబ్బందికి సమాచారం అందించారు. అగ్నిమాపక సిబ్బంది సంఘటనా స్థలానికి చేరుకొని మంటలను అదుపు చేసేందుకు ప్రయత్నిస్తున్నారు. కాగా ప్రమాదానికి గల కారణాలు తెలియాల్సి ఉంది.
Updated Date - 2023-08-02T09:32:55+05:30 IST