TS News: బెంగుళూరులో గోదావరిఖని యువతి దారుణ హత్య
ABN, First Publish Date - 2023-06-07T10:31:53+05:30
బెంగుళూరులో దారుణం చోటు చేసుకుంది. సాఫ్ట్‌వేర్ ఉద్యోగిని ఆకాంక్షను ప్రియుడు దారుణంగా హత్య చేశాడు. సాఫ్ట్‌వేర్ ఉద్యోగిని స్వస్థలం పెద్దపల్లి జిల్లా గోదావరి ఖని.
పెద్దపల్లి: బెంగుళూరులో దారుణం చోటు చేసుకుంది. పెద్దపల్లి జిల్లా గోదావరి ఖనికి చెందిన సాఫ్ట్‌వేర్ ఉద్యోగిని ఆకాంక్షను ప్రియుడు దారుణంగా హత్య చేశాడు. బెంగుళూరులో జాబ్‌ చేస్తున్న యువతిని ప్రియుడు అర్పిత్ చంపేశాడు. హైదరాబాద్‌లో పనిచేస్తున్నప్పుడు అర్పిత్ పరిచయమవ్వగా.. ఆ తరువాత ఇద్దరు ప్రేమించుకున్నారు. ఆకాంక్షను అర్పిత్ గొంతునులిమి హత్య చేశాడు. మృతదేహాన్ని కుటుంబసభ్యులు గోదావరిఖనికి తీసుకువచ్చారు. ఆకాంక్ష మీదనే కుటుంబం ఆర్థికంగా ఆధారపడింది. కన్నబిడ్డ మరణవార్తతో తల్లిదండ్రులు కన్నీరుమున్నీరుగా విలపిస్తున్నారు.
నిందితుడు అర్పిత్ ఢిల్లీకి చెందిన వ్యక్తి. ఆకాంక్ష బెంగుళూరులోని ఓ సాఫ్ట్‌వేర్ కంపెనీలో పనిచేస్తుండగా.. అర్పిత్ హైదరాబాద్‌లోనే పనిచేస్తున్నాడు. వీరిద్దరికి గత రెండేళ్లుగా పరిచయం.. ఆ తరువాత ప్రేమగా మారింది. ప్రేమ వ్యవహారమే హత్యకు కారణంగా ప్రాథమికంగా పోలీసులు భావిస్తున్నారు. ఆకాంక్ష బెంగుళూరులోని జీవనభీమా నగర పరిధిలోని కోడిహల్లిలోని ఓ అపార్ట్‌మెంట్‌లో తన స్నేహితురాలితో కలిసి నివసిస్తోంది. హైదరాబాద్‌లో ఉన్న ఆర్పిత్‌ గత ఆదివారం బెంగుళూరుకు వచ్చి ఆకాంక్షను కలిసినట్లు తెలుస్తోంది. ఈ క్రమంలో వీరిద్దరి మధ్య గొడవ చోటు చేసుకోగా.. ఈ గొడవే హత్యకు దారి తీసినట్లు పోలీసులు భావిస్తున్నారు. ఆకాంక్షను గొంతునులిమి చంపేసి.. ఆపై ఆత్మహత్యకు పాల్పడిందనే విధంగా చిత్రీకరించేందుకు అర్పిత్ ప్రయత్నించినట్లు సమాచారం. హత్య అనంతరం అర్పిత్ అక్కడి నుంచి వెళ్లిపోయాడు. ఆ తరువాత ఆకాంక్షతో కలిసి ఉన్న స్నేహితురాలు అపార్ట్‌మెంట్‌కు రాగా హత్య ఉదంతం వెలుగులోకి వచ్చింది. స్నేహితురాలి సమాచారం మేరకు పోలీసులు అక్కడకు చేరుకుని కేసు నమోదు చేసి దర్యాప్తు చేపట్టారు. అయితే నిందితుడు అర్పిత్ ఆచూకీ ఇంత వరకు తెలియరాలేదు. అర్పిత్ కోసం బెంగళూరుతో పాటు హైదరాబాద్‌లో గాలింపు చర్యలు చేపట్టారు.
Updated Date - 2023-06-07T10:31:53+05:30 IST