Kamareddy Master Plan ప్రతిపాదనపై కలెక్టర్ వివరణ
ABN, First Publish Date - 2023-01-07T14:10:17+05:30
కామారెడ్డి నూతన మాస్టర్ ప్లాన్ ప్రతిపాదనపై జిల్లా కలెక్టర్ జితేష్ వి పాటిల్ వివరణ ఇచ్చారు.
కామారెడ్డి: కామారెడ్డి నూతన మాస్టర్ ప్లాన్ (Kamareddy New Master Plan) ప్రతిపాదనపై జిల్లా కలెక్టర్ జితేష్ వి పాటిల్ (Collector Jitesh V Patil) వివరణ ఇచ్చారు. శనివారం మీడియాతో మాట్లాడుతూ.. అపోహలు నమ్మి ఆందోళన చెందుతున్నారని... అందరి అభ్యంతరాలు తీసుకుంటామని తెలిపారు. ఎవరి భూములూ నష్టపోరని స్పష్టం చేశారు. ఏదైనా ఇబ్బందులు, అభ్యంతరాలు ఇస్తే రికార్డు చేస్తామని... అందరికీ సమాధానాలు ఇస్తామని చెప్పారు. ఇది ముసాయిదా మాత్రమే అని... ఫైనల్ చేయడానికి ఇంకా సమయం ఉందని తెలిపారు. 2000లో పాత మాస్టర్ ప్లాన్ తయారైందని... అప్పుడు కూడా ఇలాంటి జోన్లు పెట్టారని...వాటిలోని భూములను ఎవరూ డిస్టర్బ్ చేయలేదని గుర్తుచేశారు. ఇప్పుడు ఎందుకు తప్పుడు ప్రచారం చేస్తున్నారని ప్రశ్నించారు. నూతన మాస్టర్ ప్లాన్‌పై ఇప్పటి వరకు 1026 అభ్యంతరాలు వచ్చాయని.. అన్నీ పరిశీలిస్తామని తెలిపారు. జనాల అభిప్రాయాలపై చర్చ ఉంటుందని... తర్వాత పై స్థాయిలో ఫైనల్ అవుతుందన్నారు. ఇండస్ట్రియల్ జోన్ కింద మార్క్ అయి ఉంటుందని తెలిపారు. భూమికి, భూ యజమానులకు ఎలాంటి నష్టం ఉండదని తేల్చిచెప్పారు. ఈనెల 11 వరకు అభ్యంతరాలు ఇవ్వచ్చని కలెక్టర్ జితేష్ వి పాటిల్ తెలిపారు.
Updated Date - 2023-01-07T14:10:19+05:30 IST