Kotam Reddy Sridhar Reddy: దమ్ముంటే నన్ను అరెస్టు చేయండి
ABN, First Publish Date - 2023-02-18T21:46:58+05:30
షాడో ముఖ్యమంత్రి సజ్జల రామకృష్ణారెడ్డి (Sajjala Ramakrishna Reddy)కి దమ్ముంటే తనను అరెస్టు చేయాలని నెల్లూరు రూరల్‌ ఎమ్మెల్యే కోటంరెడ్డి శ్రీధర్‌రెడ్డి..
నెల్లూరు: షాడో ముఖ్యమంత్రి సజ్జల రామకృష్ణారెడ్డి (Sajjala Ramakrishna Reddy)కి దమ్ముంటే తనను అరెస్టు చేయాలని నెల్లూరు రూరల్‌ ఎమ్మెల్యే కోటంరెడ్డి శ్రీధర్‌రెడ్డి (Kotam Reddy Sridhar Reddy) సవాల్‌ విసిరారు. సజ్జల కనుసన్నలతోనే నేతలు, కార్యకర్తలను పోలీసులు అరెస్టు చేసి వేధింపులకు పాల్పడుతున్నారని మండిపడ్డారు. శనివారం నెల్లూరులోని తన కార్యాలయంలో ఆయన మీడియాతో మాట్లాడారు. ప్రభుత్వ పెద్దలు అన్ని అంశాలను పక్కనపెట్టి రూరల్‌ నియోజకవర్గంపైనే దృష్టి సారించారన్నారు. నాలుగు నెలల క్రితం జరిగిన ఓ కేసులో తన ముఖ్య అనుచరుడు, మాజీ కార్పొరేటర్‌ తాటి వెంకటేశ్వరరావుతోపాటు కార్యకర్తలు జావీద్‌, మన్నేపల్లి రఘులను అరెస్టు చేశారని తెలిపారు. సజ్జల ఆదేశాల మేరకే పోలీసులు నేతలను అరెస్టు చేశారని మండిపడ్డారు. అరెస్టు చేసిన వారిని పోలీస్ స్టేషన్‌ (Police station)కు తీసుకెళ్లకుండా వాహనాల్లో తిప్పుతూ తుపాకీతో బెదిరిస్తున్నారని దుయ్యబట్టారు.
బెదిరింపులకు, వేధింపులకు తన వెనుక నడిచే నేతలు, కార్యకర్తలు భయపడరన్నారు. తనను కూడా ఈ కేసులో చేర్చడంతోపాటు తనతో పాటు 11 మందిపై ఎస్సీ, ఎస్టీ అట్రాసిటీ కేసు నమోదు చేశారన్నారు. ప్రభుత్వ పెద్దలు తన సోదరుడు గిరిధర్‌రెడ్డి పేరు పెట్టడం మరిచిపోయారా లేక ప్రత్యేకమైన ప్రేమను చూపిస్తున్నారా అని ప్రశ్నించారు. అలాంటి జిమ్మిక్కులు ఎన్ని చేసినా తాము లొంగమని, సమస్యలను ఎదర్కొని పోరాటం చేస్తామని తెలిపారు. తాను రూరల్‌ నియోజకవర్గంలోనే తిరుగుతుంటానని, దమ్ముంటే తనపై మరికొన్ని కేసులు కూడా పెట్టి అరెస్ట్ చేయాలని కోటంరెడ్డి శ్రీధర్‌రెడ్డి సవాల్‌ విసిరారు.
Updated Date - 2023-02-18T21:46:59+05:30 IST