Chandrababu: పులివెందులలో టెన్షన్.. టెన్షన్.. చంద్రబాబు సభకు అనుమతి నిరాకరణ
ABN, First Publish Date - 2023-08-02T19:46:42+05:30
టీడీపీ (TDP) అధినేత నారా చంద్రబాబునాయుడు సభకు అనుమతి లేదని పోలీసులు స్పష్టం చేశారు.
కడప జిల్లా: టీడీపీ (TDP) అధినేత నారా చంద్రబాబునాయుడు సభకు అనుమతి లేదని పోలీసులు స్పష్టం చేశారు. పులివెందుల పూలంగళ్ల సర్కిల్లో చంద్రబాబు సభకు అనుమతి ఇచ్చేందుకు పోలీసులు నిరాకరించారు. పూలంగళ్ల సర్కిల్లో భారీగా స్పెషల్ పార్టీ పోలీసులు మోహరించారు. అనుమతి లేదంటూ మీడియా వాహనాన్ని పోలీసులు ముందుకు పంపుతున్నారు. సభ నిర్వహించుకునేందుకు పోలీసులు అనుమతి ఇవ్వకపోవడంతో పులివెందుల్లో హైటెన్షన్ కొనసాగుతోంది.
పులివెందుల ప్రధాన వీధుల్లో టీడీపీ (TDP) అధినేత నారా చంద్రబాబునాయుడు (Chandrababu) రోడ్ షో కొనసాగుతోంది. అంతకు ముందు టీడీపీ ఎమ్మెల్సీ భూమి రెడ్డి రాంగోపాల్ రెడ్డి నివాసానికి చంద్రబాబు చేరుకున్నారు. చంద్రబాబుకు ఎమ్మెల్సీ రాంగోపాల్ రెడ్డి, కుటుంబ సభ్యులు ఘన స్వాగతం పలికారు.
చంద్రబాబు పర్యటనతో పులివెందులలో ఉద్రిక్త పరిస్థితులు నెలకొన్నాయి. టీడీపీ నాయకులు, కార్యకర్తలు భారీగా పులివెందులకు చేరుకున్నారు. ఈ సందర్భంగా కొందరు వైసీపీ కార్యకర్తలు వైసీపీ (YCP) జెండాలు పట్టుకొని పూల అంగళ్ల సెంటర్ వద్దకు రావడంతో అక్కడ ఉన్న టీడీపీ కార్యకర్తలు వైసీపీ కార్యకర్తలపై దాడి చేశారు. అక్కడే ఉన్న పోలీసులు ఇరు వర్గాలను చెదరగొట్టారు.
ఓపెన్ టాప్ జీప్‌తో టీడీపీ బహిరంగ సభ స్థలానికి చేరుకొని టీడీపీ కార్యకర్తలపై వైసీపీ నేతలు, కార్యకర్తలు దాడి చేశారు. టీడీపీ శ్రేణులు తిరగబడడంతో వైసీపీ నేతలు పరారయ్యారు. పరిస్థితిని పోలీసులు అదుపులోకి తెచ్చారు.
ఏపీ సీఎం వైఎస్ జగన్ మోహన్ రెడ్డి స్వగ్రామం బలపనూరులో టీడీపీ అధినేత నారా చంద్రబాబునాయుడుకు టీడీపీ నేతలు, కార్యకర్తలు ఘన స్వాగతం పలికారు. క్రేన్‌ ద్వారా భారీ గజమాలతో చంద్రబాబుకు టీడీపీ శ్రేణులు ఘన స్వాగతం పలికారు. జగన్ స్వగ్రామంలో చంద్రబాబుకు భారీ స్వాగతంపై వైసీపీ వర్గాల్లో కలవరం మొదలైంది.
Updated Date - 2023-08-02T20:10:36+05:30 IST