Krishna Dist.: పసుపు శోభను సంతరించుకున్న గుడివాడ రోడ్లు
ABN, First Publish Date - 2023-04-13T11:03:51+05:30
తెలుగుదేశం పార్టీ జాతీయ అధ్యక్షుడు నారా చంద్రబాబు నాయుడు (Nara Chandrababu Naidu) గురువారం గుడివాడకు రానున్న నేపథ్యంలో పట్టణమంతా పసుపు శోభను సంతరించుకుంది.
కృష్ణాజిల్లా: తెలుగుదేశం పార్టీ జాతీయ అధ్యక్షుడు నారా చంద్రబాబు నాయుడు (Nara Chandrababu Naidu) గురువారం గుడివాడకు రానున్న నేపథ్యంలో పట్టణమంతా పసుపు శోభను సంతరించుకుంది. ఈ రోజు సాయంత్రం చంద్రబాబు రోడ్ షో (Road Show) ద్వారా ఆర్టీసీ కాలనీ మీదుగా గుడివాడ (Gudivada) రానున్నారు. ఈ నేపథ్యంలో టీడీపీ నేతలు (TDP Leaders) చంద్రబాబు పర్యటనకు సర్వం సిద్ధం చేశారు. పెద్ద ఎత్తున సభను నిర్వహించేందుకు భారీ జన సమీకరణ చేస్తున్నారు. చంద్రబాబు పర్యటనతో తెలుగు తమ్ముళ్లలో ఉత్సాహం నెలకొంది. చంద్రబాబు పర్యటనతో రాజకీయ సమీకరణాలు (Political Equations) మారనున్నాయి. కాగా తామేంటో చూపిస్తామని వైసీపీ (YCP) యువజన విభాగ నేతలు అంటున్నారు.
మూడు రోజుల కృష్ణాజిల్లా పర్యటనలో భాగంగా నిన్న విజయవాడకు వచ్చిన చంద్రబాబుకు పార్టీ శ్రేణులు, నాయకులు, మహిళలు ఘనస్వాగతం పలికారు. చంద్రబాబు రాకతో బందరు రోడ్డు పసుపురంగుతో నిండిపోయింది. ఆరేడు కిలోమీటర్ల పొడవునా జనం చంద్రబాబు కోసం మండు టెండలో గంటల కొద్ది నిలబడి మరీ స్వాగతం పలికారు. మాజీ ఎమ్మెల్యే బోడె ప్రసాద్‌, మాజీ ఎంపీ కొనకళ్ల నారాయణ, పార్టీ జిల్లా ఉపాధ్యక్షుడు వెలగపూడి శంకరబాబు, మాజీ మంత్రి దేవినేని ఉమా, అనుమోలు ప్రభాకరరావు, గొట్టిపాటి వెంకటరామకృష్ణప్రసాద్‌, షేక్‌ బుజ్జి తదితరులు చంద్రబాబుకు స్వాగతం పలికి క్రేన్‌తో గజమాల వేశారు. అనంతరం చంద్రబాబు కాన్వాయ్‌ను వేల మంది బైక్‌ర్యాలీగా అనుసరించారు.
మార్గ మధ్యంలో కేసీపీ కాలనీ వద్ద టీడీపీ రాష్ట్ర అధికార ప్రతినిధి యార్లగడ్డ సుచిత్ర, రూప్‌కుమార్‌లు టీడీపీ కార్యకర్తలు, నాయకులతో ఘన స్వాగతం పలికారు. వీఆర్‌ సిద్ధార్థ కళాశాల వద్ద, తాడిగడప సెంటరు వద్ద టీడీపీ నాయకురాలు మేడసాని రత్నకుమారి టీడీపీ మహిళా నాయకురాళ్లతో కలిసి చంద్రబాబుకు స్వాగతం పలికారు. మార్గ మధ్యంలో ఎమ్మెల్సీ పంచుమర్తి అనురాధ కార్యకర్తలతో కలిసి చంద్రబాబుకు ఘనస్వాగతం పలికారు. పోరంకి సెంటరులో పార్టీ నాయకులు, కార్యకర్తలు చంద్రబాబుకు ఘన స్వాగతం పలికారు. గజమాలతో చంద్రబాబును సత్కరించారు. పెనమలూరులో టీడీపీ నాయకులు మారుపూడి ధనకోటేశ్వరరావు, దొంతగాని పుల్లేశ్వరరావు, కోయ ఆనంద ప్రసాద్‌, గుజ్జర్లపూడి బాబూరావు, ముసునూరి నిర్మల్‌ టీడీపీ కార్యకర్తలు, పసుపు రైతులతో కలిసి చంద్రబాబుకు ఘనస్వాగతం పలికారు.
Updated Date - 2023-04-13T11:03:51+05:30 IST