Chennai Horror: వామ్మో.. చెన్నైలో ఘోరం.. ఒళ్లు జలదరించే వీడియో..!
ABN, First Publish Date - 2023-08-10T21:57:39+05:30
తమిళనాడు రాజధాని నగరం చెన్నైలో ఘోరం జరిగింది. ఓ స్కూల్ చిన్నారి తన తల్లి, తమ్ముడుతో కలిసి రోడ్డుపై నడుచుకుంటూ వెళుతుండగా వారి పక్కగా వెళుతున్న ఆవు దాడి చేసింది. ఆవు తన కొమ్ములతో దాడి చేయడంతో ఆ పాప తీవ్రంగా గాయపడింది. అయితే.. అదృష్టవశాత్తూ ప్రాణాపాయం తప్పింది.
చెన్నై: తమిళనాడు రాజధాని నగరం చెన్నైలో ఘోరం జరిగింది. ఓ స్కూల్ చిన్నారి తన తల్లి, తమ్ముడుతో కలిసి రోడ్డుపై నడుచుకుంటూ వెళుతుండగా వారి పక్కగా వెళుతున్న ఆవు దాడి చేసింది. ఆవు తన కొమ్ములతో దాడి చేయడంతో ఆ పాప తీవ్రంగా గాయపడింది. అయితే.. అదృష్టవశాత్తూ ప్రాణాపాయం తప్పింది. చెన్నైలోని ఎంఎండీఏ కాలనీలో ఈ ఘటన జరిగింది. ఘటనా జరిగిన ప్రాంతంలో రోడ్డు పక్కన ఉన్న ఓ ఇంటి సీసీటీవీ కెమెరాలో ఆ ఒళ్లు గగుర్పొడిచే విజువల్స్ రికార్డ్ కావడం గమనార్హం. ఇంటర్నెట్‌లో ఈ ఘటనకు సంబంధించిన వీడియో వైరల్‌గా మారింది. బుధవారం సాయంత్రం 3.20 నిమిషాల సమయంలో ఈ ఘటన జరిగింది.
ఈ ఘటనకు సంబంధించిన పూర్తి వివరాల్లోకి వెళితే.. ఆరవ తరగతి చదువుతున్న ఆయేషా అనే బాలిక, ఆ బాలిక తమ్ముడు, తల్లి బుధవారం సాయంత్రం రోడ్డుపై నడుచుకుంటూ వెళుతున్నారు. బహుశా స్కూల్‌కు వెళ్లి ఆ చిన్నారిని తల్లి ఇంటికి తీసుకెళుతుండొచ్చు. ఈ ముగ్గురి ముందు.. కొంచెం పక్కగా అదే రోడ్డుపై ఒక ఆవు, ఆవు దూడ వెళుతున్నాయి. అయితే.. ఆ బాలిక తమ్ముడు ఆవు దూడను కవ్విస్తూ పిల్ల చేష్టలతో ఏవో సైగలు చేశాడు.
అంతే.. ఆ ఆవు దూడ తల్లి పక్కనే ఉన్న ఆయేషాపై విరుచుకుపడింది. కొమ్ములతో ఆ పాపను అటూఇటూ ఈడ్చేసింది. ఆవు విపరీత ప్రవర్తన చూసి ఆ చుట్టుపక్కల ఉన్న వారు తరిమే ప్రయత్నం చేశారు. అలా ముందుకు వెళ్లినట్టే వెళ్లి మళ్లీ ఆయేషా మీదకే ఆ ఆవు ఉరుక్కుంటూ వెళ్లింది. ఈ ఘటనలో గాయాల పాలు కాకుండా ఆయేషా తల్లి, తమ్ముడు తప్పించుకోగలిగారు గానీ ఆ చిన్నారి మాత్రం తీవ్రంగా గాయపడింది. కాళ్లతో కడుపులో తొక్కుతూ.. కొమ్ములతో నెట్టేస్తూ ఆ ఆవు నానా బీభత్సం సృష్టించింది. ఆ వీడియో చూస్తే మానవత్వం ఉన్న ఎవరికైనా కడుపు తరుక్కుపోతుంది. ఎట్టకేలకు ఓ వ్యక్తి కర్రతో అదిలించేసరికి ఆవు పాపను విడిచిపెట్టి అక్కడి నుంచి వెళ్లిపోయింది. ఆ పాపను వెంటనే సమీపంలోని ఆసుపత్రికి తరలించారు. ఆ పాపను వైద్యులు ప్రాణాపాయం నుంచి కాపాడారు.
Updated Date - 2023-08-11T00:21:14+05:30 IST