Chief Minister: పాత ఫియట్‌లో సీఎం స్టాలిన్‌ షికారు
ABN, First Publish Date - 2023-11-21T08:43:35+05:30
రాష్ట్ర ముఖ్యమంత్రి ఎంకే స్టాలిన్‌(Chief Minister MK Stalin) తన కాన్వాయ్‌కి స్వస్తి చెప్పి పాత ఫియట్‌ కారును తనే నడుపుకుంటూ
చెన్నై, (ఆంధ్రజ్యోతి): రాష్ట్ర ముఖ్యమంత్రి ఎంకే స్టాలిన్‌(Chief Minister MK Stalin) తన కాన్వాయ్‌కి స్వస్తి చెప్పి పాత ఫియట్‌ కారును తనే నడుపుకుంటూ వెళ్లిన వీడియో ఒకటి సోషల్‌ మీడియాలో వైరల్‌ అవుతోంది. ఆదివారం ఉదయం ఆయన ఆళ్వార్‌పేట నివాస గృహం నుంచి అడయార్‌ వరకూ కారులో షికారు చేశారు. ఆ కారుతో తనకున్న సుదీర్ఘకాలపు అనుభవాలను మంత్రి ఎం.సుబ్రమణ్యం తదితర మిత్రులకు వివరించారు. పాత ఫియట్‌ కారును నడుపుకుంటూ వెళ్తున్న స్టాలిన్‌ను చూసి పాదచారులు ఆయన నమస్కరించారు. ప్రతిగా స్టాలిన్‌ కూడా ఓ చేత కారు స్టీరింగ్‌ను పట్టుకుని, మరో చేత పాదచారుల వైపు ఊపుకుంటూ వెళ్లారు. బిసెంట్‌నగర్‌లోని కాలినడక రహదారి వద్ద కాసేపు కారును పార్కింగ్‌ చేసి ఎప్పటిలాగే ఎరుపు టీ షర్టు, నలుపు ఫ్యాంట్‌ ధరించి, చేత స్టిక్కు పట్టుకుని వాకింగ్‌ చేశారు. ఆ తర్వాత మంత్రి సుబ్రమణ్యం, తిరువళ్లూరు ఎమ్మెల్యే విజి రామచంద్రన్‌, డాక్టర్‌ సుధీర్‌రెడ్డిని ఆ చిన్న కారులో కూర్చోబెట్టుకుని ఆళ్వార్‌పేటకు తిరిగొచ్చారు. స్టాలిన్‌ ఈ కారును డీఎంకే యువజన విభాగం సభ్యుడిగా ఉన్నప్పడు కొనుగోలు చేశారు. పెళ్లైన తర్వాత సతీమణి దుర్గాస్టాలిన్‌తో ఆ ఫియట్‌ కారులోనే షికారు చేశారు. మూడేళ్లుగా స్టాలిన్‌ డీఎంకే అధ్యక్షుడిగా, ముఖ్యమంత్రిగా బిజీగా మారడంతో డ్రైవింగ్‌కూ స్వస్తి పలికారు. ఈ నేపథ్యంలో ఉన్నట్టుండి స్టాలిన్‌ బుల్లికారును డ్రైవింగ్‌ చేస్తున్న వీడియో సోషల్‌ మీడియాలో వెలువడి కలకలం సృష్టిస్తోంది.
Updated Date - 2023-11-21T08:43:36+05:30 IST