WPL: గుజరాత్ జెయింట్స్‌పై యూపీ వారియర్జ్ విజయం
ABN, First Publish Date - 2023-03-05T23:10:32+05:30
గుజరాత్ జెయింట్స్‌పై 3 వికెట్ల తేడాతో యూపీ వారియర్జ్ జట్టు ఘన విజయం సాధించింది.
ముంబై: గుజరాత్ జెయింట్స్‌పై 3 వికెట్ల తేడాతో యూపీ వారియర్జ్ జట్టు ఘన విజయం సాధించింది. గుజరాత్ జెయింట్స్ నిర్దేశించిన 170 పరుగుల విజయ లక్ష్యాన్ని యూపీ వారియర్జ్ జట్టు అలవోకగా ఛేదించింది. 19.5 ఓవర్లలో 7 వికెట్లు కోల్పోయి యూపీ వారియర్జ్ 175 పరుగులు చేసింది. గుజరాత్ జెయింట్స్(Gujarat Giants) 20 ఓవర్లలో 6 వికెట్లు కోల్పోయి 169 పరుగులు చేసింది. మహారాష్ట్రలోని నవీ ముంబైలోని డీవై పాటిల్ స్టేడియంలో డబ్ల్యూపీఎల్‌ (WPL)లో భాగంగా మూడో మ్యాచ్‌ యూపీ వారియర్జ్(UP Warriorz), గుజరాత్ జెయింట్స్(Gujarat Giants) మధ్య జరిగింది.
టాస్ గెలిచి బ్యాటింగ్ ఎంచుకున్న గుజరాత్ తొలుత జోరుగానే ఇన్నింగ్స్‌ను ప్రారంభించింది. ఓపెనర్లు సబ్బినేని మేఘన, సోఫియా డంక్లీ దూకుడుగా ఆడుతున్నట్టు కనిపించారు. అయితే 2 ఫోర్లతో 13 పరుగులు చేసిన సోఫియా‌ను దీప్తి శర్మ బౌల్డ్ చేయడంతో 34 పరుగుల తొలి వికెట్ భాగస్వామ్యానికి తెరపడింది.
ఇక ఆ తర్వాతి నుంచి క్రమం తప్పకుండా వికెట్లు కోల్పోతూ కష్టాల్లో పడినట్టు కనిపించింది. చూస్తుంటే శనివారం నాటి సీన్ రిపీటవుతుందని అనిపించింది. అయితే, హర్లీన్ డియోల్ క్రీజులో పాతుకుపోయి వికెట్ల పతనానికి అడ్డుకట్ట వేసింది. సహచర బ్యాటర్లు ఒక్కొక్కరే వెనుదిరుగుతున్నా ఏకాగ్రత కోల్పోని హర్లీన్ స్కోరు పెంచే ప్రయత్నం చేసింది. మొత్తం 32 బంతులు ఎదుర్కొన్న హర్లీన్ 7 ఫోర్లతో 46 పరుగులు చేసి 18 ఓవర్లో అవుటైంది.
ఆష్లీ గార్డనర్ 25, దయాళన్ హేమలత 21 పరుగులు చేశారు. అన్నాబెల్ సుదర్‌లాండ్ (8), సుష్మా వర్మ (9) నిరాశ పరిచారు. అప్పటి వరకు కట్టుదిట్టంగా బౌలింగ్ చేసిన యూపీ బౌలర్లు ఆఖర్లో కట్టుతప్పారు. చివరి ఐదు ఓవర్లలో ఏకంగా 53 పరుగులు సమర్పించుకోవడంతో గుజరాత్‌కు భారీ స్కోరు సాధ్యమైంది. యూపీ వారియర్జ్ బౌలర్లలో దీప్తి శర్మ, సోఫీ ఎక్లెస్టోన్ చెరో రెండు వికెట్లు తీసుకున్నారు.
Updated Date - 2023-03-05T23:32:30+05:30 IST