Neelam Madhu: బీఆర్‌ఎస్ అభ్యర్థి గూడెం మహిపాల్ రెడ్డి ఓటమి తథ్యం
ABN, First Publish Date - 2023-11-07T15:54:22+05:30
ఢిల్లీ నుంచి పటాన్‌చెరుకు వచ్చిన కాంగ్రెస్ అభ్యర్థి నీలం మధుకు అనుచరులు ఘన స్వాగతం పలికారు.
సంగారెడ్డి: ఢిల్లీ నుంచి పటాన్‌చెరుకు వచ్చిన కాంగ్రెస్ అభ్యర్థి నీలం మధుకు (Congress Candidate Neelam Madhu) అనుచరులు ఘన స్వాగతం పలికారు. అనంతరం పటాన్‌చెరు నుంచి రుద్రారం గణేష్‌గడ్డకు భారీ ర్యాలీగా చేరుకున్నారు. అక్కడ సిద్ది వినాయకునికి నీలం ప్రత్యేక పూజలు చేశారు. అనంతరం నీలం మధు మాట్లాడుతూ... అహంకారానికి, ఆత్మగౌరవానికి మధ్య పోరాటం ఇది అని అన్నారు. తెలంగాణ రాష్ట్రాన్ని ఇచ్చింది సోనియమ్మ (Sonia Gandhi) అని అన్నారు. సోనియమ్మ ఇచ్చిన తెలంగాణలో కాంగ్రెస్ అధికారంలోకి రావడం ఖాయమని ధీమా వ్యక్తం చేశారు. కల్వకుంట్ల కుటుంబంలో‌ని ఆ నలుగురికే ఆత్మగౌరవమా అని ప్రశ్నించారు. బీసీలందరికి ఆత్మగౌరవం ఉందని.. దాని కోసమే ఈ పోరాటం అని చెప్పుకొచ్చారు. పాదయాత్రలో వచ్చిన స్పందన చూసి కాంగ్రెస్ పార్టీ పిలిచి టికెట్ ఇచ్చిందన్నారు. ఆరు గ్యారంటీ పథకాలను ఇంటింటికి తీసుకెళ్దామని అన్నారు. బీఆర్‌ఎస్ అభ్యర్థి గూడెం మహిపాల్ రెడ్డి ఓటమి తథ్యం అని నీలం మధు స్పష్టం చేశారు.
Updated Date - 2023-11-07T15:54:23+05:30 IST