Hyderabad: మీరు అదేపనిగా బైక్, కారు సైరన్ మోగిస్తున్నారా..అయితే రిస్క్‌లో పడ్డట్టే..! వాహనదారులు ఈ విషయం తప్పక తెలుసుకోవాల్సిందే..
ABN, First Publish Date - 2023-05-07T12:11:54+05:30
మీ బైక్‌లకు, కార్లకు మల్టీటోన్ హారన్లు వాడుతున్నారా..అదేపనిగా గట్టిగా మోగిస్తున్నారా?..అనవసరంగా సైరన్ మోగిస్తే ..
హైదరాబాద్: మీ బైక్‌లకు, కార్లకు మల్టీటోన్ హారన్లు వాడుతున్నారా..అదేపనిగా గట్టిగా మోగిస్తున్నారా?..అనవసరంగా సైరన్ మోగిస్తే ఎంత న్యూసెన్స్‌గా ఉంటుందో మనందరికి తెలుసు..అయినప్పటికీ గట్టిగా హారన్ మోగిస్తూనే ఉంటాం. అయితే మల్టీటోన్ హారన్లు, సైరన్లు వినియోగిస్తూ సౌండ్ పొల్యూషన్ క్రియేట్ చేస్తే బ్యాండ్ మోగుద్ది అంటున్నారు హైదరాబాద్ ట్రాఫిక్ పోలీసులు. మామూలుగా కాదు.. ఏకంగా క్రిమినల్ కేసులు బుక్ చేస్తున్నారు.
నగర పరిధిలో ప్రభుత్వ, ప్రైవేట్ వాహనాలకు అనధికారికంగా సైరన్లు వినియోగిస్తే క్రిమినల్ కేసులు నమోదు చేస్తామని హైదరాబాద్ ట్రాఫిక్ అడిషనల్ సీపీ సుధీర్‌బాబు హెచ్చరించారు. ఈమేరకు స్పెషల్ నిర్వహిస్తున్నామన్నారు. సైరన్లు, మల్టీటోన్ హారన్లు అమర్చిన వాహనాలపై హైదరాబాద్ ట్రాఫిక్ పోలీసులు గత 12 రోజుల్లో 1,557 కేసులు నమోదు చేశారు.పోలీసులు చట్టవిరుద్ధంగా అమర్చిన సైరన్‌లను కూడా తొలగించారు. చట్టం ప్రకారం అధికారం లేని ధ్వని ఉత్పత్తి చేసే పరికరాలను అమర్చిన కార్ డెకర్‌లు/మెకానిక్‌లకు నోటీసులు అందించారు.చట్టవిరుద్ధమైన సైరన్లు అమర్చకుండా తమను తాము నిరోధించాలని కోరారు, వారికి అందజేసిన నోటీసులోని విషయాలను ఉల్లంఘిస్తే చట్టపరమైన చర్యలు తీసుకుంటామని హెచ్చరించారు. కార్ డెకర్ షాపు యజమానులతో పోలీసులు సమావేశం కానున్నారు.
ట్రాఫిక్ క్లియరెన్స్ కోసం తోటి వాహనదారులను అప్రమత్తం చేయాలనే ఉద్దేశ్యంతో వాహన యజమానులు సైరన్లు బిగించి, తద్వారా ప్రయాణికులకు ఇబ్బంది కలిగిస్తున్నారు. అనధికారికంగా సైరన్లు వినియోగిస్తున్న వాహనాల యజమానుల చర్య మోటారు వాహనాల చట్టాన్ని ఉల్లంఘించడమే అవుతుందన్నారు.
హారన్లకు సంబంధించిన నిబంధనలను ఉల్లంఘించే వారిపై కఠిన చర్యలు తీసుకోవాలని, వాహనాల సైరన్/మల్టీ టోన్డ్ హారన్లు కనిపిస్తే వాటిని జప్తు చేయాలని కూడా హైకోర్టులు తమ తీర్పుల్లో పోలీసులకు సూచించాయి. సెంట్రల్ మోటార్ వెహికల్స్ రూల్స్, 1989లోని రూల్ 119ని ప్రతివాదులు పునరావృతం చేస్తే హైదరాబాద్ ట్రాఫిక్ పోలీసులు క్రిమినల్ కేసు నమోదు చేస్తారని అదనపు కమిషనర్ తెలిపారు.
అయితే అంబులెన్స్‌లు, సీఎం, పీఎం, పోలీసు కాన్వాయ్‌లకు మాత్రమే నిబందనల మేరకు సైరన్ వినియోగించే అవకాశం ఉందన్నారు. ప్రజాప్రతినిధులు, వారి బంధుమిత్రులు, ఉన్నతాధికారులు అనధికారికంగా సైరన్లు ఏర్పాటు చేసుకొని దుర్వినియోగం చేస్తున్నారని తెలిపారు. ఇకపై ఎవరైనా మల్టీటోన్డ్ హారన్లు, సైరన్లు వినియోగిస్తే కఠిన చర్యలు తప్పవని అడిషనల్ సీపీ సుధీర్‌బాబు హెచ్చరించారు.
Updated Date - 2023-05-07T12:13:47+05:30 IST