తిరుమలలో 15 నుంచి పవిత్రోత్సవాలు

తిరుమల, ఆగస్టు 10 (ఆంధ్రజ్యోతి): తిరుమల శ్రీవారి ఆలయంలో ఈనెల 15 నుంచి 17వ తేదీ వరకు పవిత్రోత్సవాలు జరగనున్నాయి. ఏడాది పొడవునా ఆలయంలో జరిగే అర్చనలు, ఉత్సవాల్లో యాత్రికులు, సిబ్బంది వల్ల తెలియక కొన్ని దోషాలు కలుగుతుంటాయి. ఈక్రమంలో వీటివల్ల ఆలయ పవిత్రతకు ఎలాంటి లోపం రానీయకుండా ఆగమశాస్త్రం ప్రకారం పవిత్రోత్సవాలు నిర్వహిస్తారు. పవిత్రోత్సవాలు తిరుమలలో 15-16 శతాబ్దాల వరకు జరిగినట్టు ఆధారాలున్నాయి. 1962 నుంచి దేవస్థానం ఈ ఉత్సవాలను తిరిగి ప్రారంభించింది. ఉత్సవాల్లో భాగంగా మూడ్రోజులపాటు ఆలయంలోని సంపంగి ప్రాకారంలో ఉదయం 9 నుంచి 11 గంటల వరకు స్నపన తిరుమంజనం నిర్వహిస్తారు. సాయంత్రం ప్రత్యేకంగా ఆలంకరించిన ఆభరణాలతో శ్రీదేవి, భూదేవి సమేత మలయప్పస్వామి ఆలయ నాలుగు మాడవీధుల్లో విహరించి భక్తులకు దర్శనమిస్తారు. 15న పవిత్ర ప్రతిష్ఠ, 16న పవిత్ర సమర్పణ, చివరిరోజు పూర్ణాహుతితో పవిత్రోత్సవాలు ముగుస్తాయి.

ఆర్జితసేవలు రద్దు

పవిత్రోత్సవాల్లో భాగంగా ఈనెల 14న అంకురార్పణ జరుగుతుంది. ఈ సందర్భంగా సహస్రదీపాలంకార సేవను టీటీడీ రద్దు చేసింది. అలాగే 15న తిరుప్పావడ, 15 నుంచి 17వ తేదీ వరకు కల్యాణోత్సవం, ఊంజల్‌సేవ, ఆర్జితబ్రహ్మోత్సవం, సహస్రదీపాలంకార సేవలను టీటీడీ రద్దు చేసింది. 18వ తేదీ కూడా కల్యాణోత్సవాన్ని రద్దు చేశారు.