ట్రాక్టరు డ్రైవర్‌ మృతి

శ్రీకాళహస్తి, ఆగస్టు 10: తల్లిదండ్రులు లేకపోయినా ట్రాక్టర్‌ డ్రైవర్‌గా ఆ యువకుడు జీవనం సాగించేవాడు. బతుకునిచ్చిన బండి కింద అలసటతో ఆదమరచి నిద్రించాడు. దీన్ని యజమాని చూసుకోకుండా ట్రాక్టర్‌ను నడపడంతో బతుకుబండే ఆ యువకుడిని బలి తీసుకున్న విషాద సంఘటన తొట్టంబేడు మండలం రౌతుసూరమాల వద్ద జరిగింది. బుచ్చినాయుడుకండ్రిగ మండలం భవానీశంకరాపురానికి చెందిన గుణశేఖర్‌(20)కు బాల్యంలోనే తల్లిదండ్రులు మృతి చెందారు. దాంతో బంధువుల సంరక్షణలో పెరిగాడు. పెద్దవాడయ్యాక తొట్టంబేడు మండలం రౌతుసూరమాల వద్ద గ్రావెల్‌ ట్రాక్టర్‌కు డ్రైవర్‌గా పనిచేస్తున్నాడు. మధ్యాహ్నం వేళ విరామ సమయంలో ట్రాక్టర్‌ కింద నీడలో సేద తీరేవాడు. శనివారం కూడా తన ట్రాక్టర్‌ ట్రాలీ కింది నిద్రించాడు. దీన్ని గమనించని ట్రాక్టర్‌ యజమాని ఆ వాహనాన్ని నడపడంతో దానికింద ఉన్న గుణశేఖర్‌పైకి ఎక్కడంతో తీవ్రంగా గాయపడ్డాడు. చికిత్స నిమిత్తం తిరుపతిలోని ప్రైవేటు వైద్యశాలకు తరలించారు. అక్కడ చికిత్స పొందుతూ రాత్రి మృతి చెందాడు. గుణశేఖర్‌కు సమీప బంధువు బత్తెయ్య తొట్టంబేడు పోలీసులకు ఫిర్యాదు చేశాడు. మృతదేహాన్ని పోలీసులు శ్రీకాళహస్తి ప్రభుత్వ ఏరియా ఆస్పత్రి మార్చురీకి తరలించారు. కేసు నమోదు చేసి దర్యాప్తు చేస్తున్నారు.