Ram Mandir: అయోధ్య చేరుకున్న పవన్ కల్యాణ్‌
ABN, Publish Date - Jan 21 , 2024 | 06:53 PM
అయోధ్య రామ మందిర ప్రారంభోత్సవానికి ఆహ్వానం అందడంతో పవర్‌ స్టార్, జనసేన అధినేత పవన్ కల్యాణ్‌ ( Pawan Kalyan ) ఆదివారం సాయంత్రం అయోధ్య చేరుకున్నారు.
Ram Mandir: అయోధ్యలో రామ మందిర (Ram Mandir) పునఃప్రతిష్ఠాపనకు మరికొన్ని గంటలే సమయం ఉంది. రేపు (సోమవారం) మధ్యాహ్నం 12.20 గంటలకు రామ్‌లల్లా ప్రతిష్ఠాపన కార్యక్రమం అంగరంగ వైభవంగా జరగనున్నది. ఈ కార్యక్రమం కోసం కనీవినీ ఎరుగని రీతిలో ఏర్పాట్లు చేశారు. పునఃప్రతిష్ఠాపనకు ముఖ్య అతిథిగా ప్రధాని నరేంద్ర మోదీ హాజరుకానున్నారు. ఈ కార్యక్రమానికి వివిధ రంగాలకు చెందిన ప్రముఖులను ఆహ్వానించిన సంగతి తెలిసిందే.
టాలీవుడ్ పవర్‌ స్టార్, జనసేన అధినేత పవన్ కల్యాణ్‌ (Pawan Kalyan) ఆదివారం సాయంత్రం అయోధ్యకు చేరుకున్నారు. పవన్‌తో పాటు సూపర్‌స్టార్ రజినీకాంత్, పలువురు ప్రముఖులు చేరుకున్నారు. ఈ సందర్భంగా పవన్ మీడియాతో మాట్లాడుతూ.. అయోధ్యలో శ్రీరామ మందిర నిర్మాణం కల.. 500 ఏళ్ల తర్వాత నెరవేరుతోందన్నారు. ప్రాణప్రతిష్ఠ కార్యక్రమంలో తాను పాలుపంచుకోవడం అదృష్టంగా భావిస్తున్నానన్నారు. అయోధ్య రామ మందిర నిర్మాణం కోసం రూ. 30 లక్షల విరాళాన్ని పవన్ కళ్యాణ్ అందజేసిన విషయం తెలిసిందే.
అలాగే తన వ్యక్తిగత సిబ్బంది సమకూర్చిన రూ. 11,000 చెక్కును సైతం రామమందిర ట్రస్ట్ సభ్యులకు అందజేశారు. పవన్‌తో పాటు అయోధ్యకు ఏపీ నుంచి టీడీపీ ఎమ్మెల్యే వెలగపూడి రామకృష్ణ బాబు, బీజేపీ నేతలు విష్ణుకుమార్ రాజు, మాధవ్, ఎమ్మెల్సీ వంశీ కృష్ణ శ్రీనివాస్, పంచకర్ల రమేష్ బాబు, మూర్తి యాదవ్ కూడా వెళ్లారు.
Updated Date - Jan 21 , 2024 | 08:25 PM
