అంతా ఫ్రీ హోల్డ్‌!

అందులో లక్షా 36వేల ఎకరాలు అసైన్డ్‌ భూమి

4వేల ఎకరాలకు రిజిస్ట్రేషన్‌ చేసినట్లు గుర్తింపు

వైసీపీ నాయకుల కనుసన్నల్లోనే అక్రమం

కనిగిరి, మార్కాపురం డివిజన్లలోనే అధికం

అధికారుల విచారణలో వెలుగులోకి అవకతవకలు

గత వైసీపీ సర్కారు తీసుకొచ్చిన ‘ఫ్రీ హోల్డ్‌’ చట్టం అక్రమార్కులకు వరంగా మారింది. ప్రభుత్వ భూములను అప్పనంగా దోచుకునేందుకు దోహదపడింది. పెత్తందార్లు చేతుల్లో ఉన్న ఆక్రమిత భూములకు చట్టబద్ధత కల్పించేందుకు ఉపయోగపడింది. వైసీపీ నేతలు రూ.కోట్లకు పడగెత్తేలా చేసింది. అధికారులను దారికి తెచ్చుకుని భూములను రిజిస్ర్టేషన్‌ చేయించుకుని.. ఆపై అమ్మి సొమ్ము చేసుకోవడానికి దారులు కల్పించింది. జిల్లావ్యాప్తంగా 1.36 లక్షల ఎకరాలు అసైన్డు భూములకు యాజమాన్య హక్కులు కల్పించినట్లు, వీటిలో 4వేల ఎకరాలు రిజిస్ట్రేషన్‌ కూడా చేయించినట్లు అధికారుల పరిశీలనలో తేలింది. వీటిలో అత్యధికం కనిగిరి, మార్కాపురం డివిజన్లలోనే ఉన్నాయంటే ఇక్కడ అక్రమాలు ఏ స్థాయిలో జరిగాయో తేటతెల్లమవుతోంది.

ఒంగోలు (కలెక్టరేట్‌), అక్టోబరు 9 : ఏళ్ల తరబడి అనుభవంలో ఉన్న అసైన్డ్‌ భూములను అమ్ముకునేందుకు అవకాశం కల్పించినదే ఫ్రీ హోల్ట్‌ చట్టం. గత వైసీపీ ప్రభుత్వం తెచ్చిన ఈ చట్టం అక్రమార్కులకు వరంగా మారడంతోపాటు అధికారులకు కాసుల వర్షం కురిపించింది. వైసీపీ ప్రభుత్వం గతేడాది అసైన్డ్‌, చుక్కలు, ఇనాం భూములకు స్వేచ్ఛ కల్పిస్తున్నామని ప్రచారం చేసి గ్రామగ్రామానా సభలు పెట్టి రైతులకు హక్కులు ఇస్తున్నామని పైకి ఊదరగొట్టి లోలోపల వైసీపీ దళారులు బాగుపడటానికి అవకాశం కల్పించింది. కూటమి ప్రభుత్వం ఏర్పడ్డాక ఫ్రీ హోల్డ్‌ భూములపై దృష్టి పెట్టింది. రాష్ట్ర వ్యాప్తంగా అన్ని రకాల భూ రికార్డుల పరిశీలన ప్రారంభించింది. గతేడాది డిసెంబర్‌ నుంచి ఈ ఏడాది ఏప్రిల్‌ వరకు జిల్లావ్యాప్తంగా లక్షా 84వేల ఎకరాలకు జగన్‌ సర్కారు పూర్తి యాజమాన్య హక్కులు కల్పించినట్టు తేలింది. అందులో లక్షా 36 వేల ఎకరాలు అసైన్డ్‌భూములు, 37వేల ఎకరాల చుక్కల భూములు, 9వేల ఎకరాలు ఇనాం భూములు ఉన్నట్టు అధికారులు గుర్తించారు. 4వేల ఎకరాల అసైన్డ్‌ భూములను రిజిస్ట్రేషన్‌ చేసినట్లు ఇప్పటి వరకూ అధికారులు చేసిన విచారణలో తేలింది. విచారణ పూర్తయితే ఎన్నివేల ఎకరాలు ఫ్రీ హోల్డ్‌ అయ్యాయో వెలుగులోకి వచ్చే అవకాశముంది.

జిల్లావ్యాప్తంగా ఫ్రీ హోల్డ్‌ భూములు

అసైన్డ్‌ భూములు : 1,36,000

చుక్కల భూములు : 37,000

సర్వీస్‌, ఇనాం భూములు : 9,000

డివిజన్ల వారీగా ఫ్రీ హోల్డ్‌ భూములు

డివిజన్‌ ఎకరాలు

కనిగిరి డివిజన్‌ 84,611

మార్కాపురం డివిజన్‌ 48,523

ఒంగోలు డివిజన్‌ 3,286

మండలాల వారీగా ఫ్రీ హోల్డ్‌లో పెట్టిన అసైన్డ్‌ భూముల వివరాలు

మండలం ఎకరాలు

సీఎ్‌సపురం 8,505

దర్శి 2,302

దొనకొండ 125

హనుమంతునిపాడు 8,456

కనిగిరి 11,931

కేకేమిట్ల 12,750

కురిచేడు 689

మర్రిపూడి 6591

పిసిపల్లి 9773

పామూరు 4945

పొదిలి 9723

పొన్నలూరు 1761

వెలిగండ్ల 7055

ఆర్ధవీడు 272

బేస్తవారిపేట 4,344

కంభం 1,043

దోర్నాల 4,054

గిద్దలూరు 4,374

కొమరోలు 1,168

మార్కాపురం 3,501

పెద్దారవీడు 4,940

పుల్లలచెరువు 10,464

రాచర్ల 1,984

తర్లుబాడు 5,227

త్రిపురాంతకం 4,502

వైపాలెం 2,646

చీమకుర్తి 138

కొండపి 298

కొత్తపట్నం 651

ముండ్లమూరు 291

నాగులుప్పలపాడు1,114

ఒంగోలు 402

జరుగుమల్లి 197

వైసీపీ నేతలకు అనుకూలంగా భూములు

గత ప్రభుత్వ నిర్ణయం వైసీపీ నేతలకు వరంగా మారింది. వేల కోట్ల విలువచేసే భూములను కొల్లగొట్టడానికి ఉపయోగపడింది. చాలా మంది వైసీపీ నేతలు విలువైన భూములను తమ కుటుంబ సభ్యులు, అనుచరుల పేరుతో రిజస్ట్రేషన్‌ చేయించుకున్నారు. మార్కాపురం, కనిగిరి డివిజన్లలో ఈ భూముల వ్యవహారం మరింత ఎక్కువగా ఉంది. డివిజన్‌ కేంద్రమైన కనిగిరితోపాటు ఆ నియోజకవర్గంలోని అన్ని మండలాల్లో ఇదే పరిస్థితి నెలకొంది. అప్పటి ముఖ్య ప్రజాప్రతినిధి కనుసన్నల్లోనే ఈ ప్రక్రియ జరిగిందనే ఆరోపణలు బలంగా ఉన్నాయి.

మార్కాపురం, కనిగిరి డివిజన్లలోనే అత్యధికం

జిల్లాలోని మార్కాపురం, కనిగిరి డివిజన్లలోనే అత్యధికంగా అసైన్డ్‌భూములను ఫ్రీహోల్డ్‌లో పెట్టారు.

కనిగిరి డివిజన్‌లో 1,95,938 ఎకరాలు అసైన్డ్‌ భూములు ఉండగా అందులో 84,611 ఎకరాలను ఫ్రీ హోల్డ్‌లో ఉంచారు.

మార్కాపురం డివిజన్‌లో 1,19,228 ఎకరాలు అసైన్డ్‌ భూములు ఉండగా అందులో 48,523 ఎకరాలను ఫ్రీహోల్డ్‌ చేశారు.

ఒంగోలు డివిజన్‌లో 29,571 ఎకరాలు అసైన్డ్‌ భూములు ఉండగా 3,286 ఎకరాలను ఫ్రీ హోల్డ్‌లో పెట్టారు. సింగరాయకొండలో 3.91 ఎకరాలు, మద్దిపాడు 5.70 ఎకరాలు, టంగుటూరు 58 ఎకరాలు, సంతనూతలపాడు 52.53 ఎకరాలు, తాళ్లూరు 72 ఎకరాలను ఫ్రీ హోల్డ్‌లో పెట్టగా జిల్లాలోని మిగిలిన మండలాల్లో వంద నుంచి వేల ఎకరాలను ఫ్రీ హోల్డ్‌ చేశారు.