1. • Home » Editorial » Death of butterflies

సీతాకోకల మరణం

ఈ రాతిరిని కాసేపు అలానే ఉండనివ్వండి వీలు కుదిరితే ఏ మత్తో మందో చల్లి గాఢంగా నిద్రపుచ్చండి వేకువైతే ఏ తూటా ఆ పసి దేహాలను చిదిమేస్తుందో...

ఈ రాతిరిని

కాసేపు అలానే ఉండనివ్వండి

వీలు కుదిరితే

ఏ మత్తో మందో చల్లి గాఢంగా నిద్రపుచ్చండి

వేకువైతే

ఏ తూటా ఆ పసి దేహాలను చిదిమేస్తుందో

ఏ ఫిరంగిమోత ఆ లేత గుండెలను

బద్దలు చేస్తుందో తెలియదు

కొంచెంసేపైనా వాళ్ళను కునుకు తీయనివ్వండి

కళ్ళలో కొన్ని స్వప్నాలైనా మొలకెత్తనివ్వండి

ఏమాత్రం అలజడి చేయకండి

జోల పాడేందుకు అమ్మ లేదు

అసలే బెదరనివ్వకండి

ధైర్యం చెప్పేందుకు నాన్న రాలేడు

ఏ పరుపో పానుపో

పరచడానికి సిద్ధం కాకండి

బాల్యం మట్టిలో దాచుకుంది

ఆ జ్ఞాపకాల్లోంచి కాస్త ఊపిరిని తీసుకోనివ్వండి

దయచేసి

ఆ చెంపలపై జారుతున్న నెత్తుటి చారికలను

తుడిచేయకండి

యుద్ధభూమిలో సీతాకోకల మరణం

ఏ స్వేచ్ఛకు పునాదిగా నిలబడుతుందో

చరిత్రకు తెలియజెప్పాలి.

బిల్ల మహేందర్‌

91776 04430