సమాంతర రేఖలు
ABN, Publish Date - Jun 24 , 2024 | 05:55 AM
ఎక్కడో ఆగిపోతారు వాళ్ళు ఆ పాత సంగతులనే దుక్కీ దున్ని పొడవు వెడల్పులను కత్తిరించి అరచేతి పరిమాణానికి ప్రపంచాన్ని కుదించి...
సమాంతర రేఖలు
1
ఎక్కడో ఆగిపోతారు వాళ్ళు
ఆ పాత సంగతులనే దుక్కీ దున్ని
పొడవు వెడల్పులను కత్తిరించి
అరచేతి పరిమాణానికి ప్రపంచాన్ని కుదించి
2
మనిషి సంకుచితాలన్నీ
అభ్యంతరాలుగా రూపుదిద్దుకుంటాయి!
సాకులని చంకనపెట్టుకుని
ప్రపంచం ఎప్పుడూ కుంటుతూనే ఉంటుంది!
3
ఏ ఇదమిత్థాలలో లేని లోకమా,
బహుశా ప్రేమ బానిసత్వమన్న నెపం వేసి
ఏ దయను తాకవనుకుంటా
4
వ్యాపిస్తున్నట్లుగా కనిపిస్తూ
కుంచించుకుపోవటం నీకు తెలిసిన విద్య
విస్తరించే ప్రతిసారి
గాయాలతో లోపలికి తెరుచుకోవటం
నేను తప్పించుకోలేని బలహీనత!
5
సంకోచ వ్యాకోచాలకి
ఎవరికి అర్థాలు వారే ఇచ్చుకునే
ఆత్మ సంతృప్త జీవులు మనుషులు!
ఓ ప్రపంచమా
అందుకేనేమో...
నువ్వు చెప్పే మరణాలు నావి కాదు
నేను చెప్పే మరణాలు నీవి కాదు!
6
దేని ప్రత్యేకత దానిదే
అన్న వాస్తవాన్ని విస్మరించటం వల్లనేమో
సమాంతర రేఖలుగా మిగిలి
ఇన్ని రాద్ధాంతాలలోకి లాగబడుతున్నాం!
రాళ్ళబండి శశిశ్రీ
74163 99396
Updated Date - Jun 24 , 2024 | 05:55 AM
