Donald Trump: కెనడా, మెక్సికోలకు అన్ని రాయితీలా.. అవి అమెరికాలో విలీనమైతేనే మేలు
ABN, Publish Date - Dec 10 , 2024 | 03:19 AM
పొరుగు దేశాలకు అమెరికా ఇస్తున్న రాయితీలపై కాబోయే ఆ దేశ అధ్యక్షుడు డొనాల్డ్‌ ట్రంప్‌ తనదైన శైలిలో స్పందించారు.
న్యూయార్క్‌, డిసెంబరు 9: పొరుగు దేశాలకు అమెరికా ఇస్తున్న రాయితీలపై కాబోయే ఆ దేశ అధ్యక్షుడు డొనాల్డ్‌ ట్రంప్‌ తనదైన శైలిలో స్పందించారు. కెనడా, మెక్సికోకు భారీగా రాయితీలివ్వడం కంటే ఆ రెండు దేశాలు అమెరికాలో విలీనమైతేనే బాగుంటుందని వ్యాఖ్యానించారు. అమెరికాలోకి ఆయా దేశాల నుంచి అక్రమ వలసదారులను నియంత్రించకపోతే దిగుమతులపై భారీ సుంకాలు విధిస్తానని మరోసారి హెచ్చరించారు. ఆదివారం ఓ మీడియా సంస్థకు ఇచ్చిన ఇంటర్వ్యూలో ట్రంప్‌ పలు అంశాలపై మాట్లాడారు. ‘మెక్సికోకు ఏటా 300 బిలియన్‌ డాలర్లు (రూ.24 లక్షల కోట్లు), కెనడాకు 100 బిలియన్‌ డాలర్ల (రూ.8 లక్షల కోట్లకు పైగా) రాయితీలు ఇస్తున్నాం.. అసలు ఎందుకు ఆ దేశాలకు మనం రాయితీలు ఇవ్వాలి. దానికంటే ఆ దేశాలు అమెరికాలో విలీనమై రాష్ట్రాలుగా మారితే మేలు’ అని అన్నారు. ఇక అక్రమ వలసదారులపై స్పందిస్తూ.. అధికారం చేపట్టిన మొదటి రోజు నుంచే పుట్టుకతో సంక్రమించే పౌరసత్వంపై దృష్టి పెడతానని చెప్పారు. వచ్చే నాలుగేళ్లలో అక్రమ వలసదారులను అమెరికా దాటిస్తానని ప్రకటించారు.
Updated Date - Dec 10 , 2024 | 03:22 AM
