ఆత్మహత్యకు ముందు స్నానం.. శివనామ స్మరణ

ఏమేం చేయాలో రాసుకొని, ఆచరించి బెంగళూరులో యూపీ వాసి ఆత్మహత్య

బెంగళూరు, డిసెంబరు 9 (ఆంధ్రజ్యోతి): ‘ఆత్మహత్యకు ముందు స్నానం చేయాలి.. వందసార్లు శివనామస్మరణ చేయాలి. సూసైడ్‌ నోట్‌ను హైకోర్టు, సుప్రీంకోర్టు, ఆఫీసు, కుటుంబ సభ్యులకు మెయిల్‌ చేయాలి. చివరిగా తాడు సిద్ధం చేసుకోవాలి..’ ఇలా ప్రతి ఒక్కటీ రెండు రోజుల ముందే అన్నీ ప్రణాళికాబద్ధంగా రాసిపెట్టుకుని.. ఓ వ్యక్తి ఉరి వేసుకుని ఆత్మహత్య చేసుకున్నాడు. బెంగళూరు నగరం మాతరహళ్ళిలో ఆదివారం రాత్రి ఈ ఘటన జరిగింది. ఉత్తరప్రదేశ్‌కు చెందిన అతుల్‌ సుభాష్‌.. మాతరహళ్ళిలోని మంజునాథ లే అవుట్‌లో నివాసం ఉంటున్నాడు. కొంతకాలంగా మానసిక సమస్యలు ఎదుర్కొంటున్నాడు. దీంతో ఆత్మహత్య చేసుకోవాలని నిర్ణయించుకున్నాడు. తన ఆత్మహత్యకు కారణాలు, ప్రణాళిక.. ఇలా అన్ని వివరాలతో 40 పేజీల సూసైడ్‌ నోట్‌ రాసిపెట్టాడు. ‘చనిపోవడానికి ఒక రోజు ముందే అన్ని పేమెంట్లు క్లియర్‌ చేయాలి. ఆఫీసు పనిపూర్తి చేయాలి. ల్యాప్‌టాప్‌, చార్జర్‌, ఐడీని ఆఫీసులో అప్పగించాలి’ అని పక్కాగా టైం టేబుల్‌ రాసుకొని ఆచరించాడు. భార్యతో విబేధాలు వచ్చాక తాను ఎదుర్కొన్న సమస్యలను సూసైడ్‌ నోట్‌లో సమగ్రంగా పొందుపరిచాడని పోలీసులు తెలిపారు.’