మధ్యాహ్నం నిద్ర ఇబ్బంది పెడుతుంటే

మధ్యాహ్నం కునుకు మంచిదే అంటారు. కానీ ఆఫీసులో ఆ కునుకు కెరీర్‌పై ప్రభావాన్ని చూపించవచ్చు. మధ్యాహ్నం నిద్ర చాలామందికి ఎదురయ్యేదే. ఈ పరిస్థితిని బయటపడాలంటే ఇలా చేయాలంటున్నారు నిపుణులు.

• లంచ్‌లో ఎక్కువ కార్బోహైడ్రేట్స్‌ లేకుండా చూసుకోవాలి. ముఖ్యంగా రైస్‌ తినడం వల్ల నిద్ర ముంచుకొస్తుంది. కార్బోహైడ్రేట్స్‌లో గ్లైసెమిక్‌ ఇండెక్స్‌ ఎక్కువగా ఉంటుంది. ఇది నిద్రను ప్రేరేపించే రసాయనం అయినటువంటి ట్రిప్టోఫన్‌ను వేగంగా విడుదలయ్యేలా చేస్తుంది.

• రాత్రుళ్లు పొద్దుపోయే వరకు టీవీ చూడటం వల్ల దాని ప్రభావం నిద్రపై పడుతుంది. బెడ్‌పైకి చేరిన తరువాత ఫోన్‌ చూసే అలవాటు కూడా మంచిది కాదు. బ్లూ లైట్‌ నిద్రను దూరం చేస్తుంది.

• రాత్రివేళ త్వరగా పడుకుని, సూర్యోదయం కన్నా ముందే లేవడం అలవాటు చేసుకోవాలి. దీనివల్ల శరీరానికి, మనసుకు అవసరమైన విశ్రాంతి లభిస్తుంది. ఇది రోజంతా యాక్టివ్‌గా ఉండటానికి దోహదపడుతుంది.

• శరీరానికి తగినంత ఎనర్జీ అందనప్పుడు కూడా అలసట వస్తుంది. శక్తి కావాలంటే నట్స్‌, బెర్రీస్‌, డేట్స్‌ తీసుకోవాలి. ఇవి ఎక్కువ ఎనర్జీని అందిస్తాయి. ఇవి అలసటను దూరం చేసి శరీరానికి శక్తిని అందిస్తాయి.

• ప్రతిరోజు వ్యాయామం చేయడం అలవాటు చేసుకోవాలి. దీనివల్ల ఆ రోజంతా హుషారుగా ఉంటుంది. కనీసం నలభై ఐదు నిమిషాలు వేగంగా వాకింగ్‌ చేస్తే మంచి ఫలితం ఉంటుంది. యోగా, మెడిటేషన్‌ వంటివి కూడా మంచి ఫలితాలను ఇస్తాయి.

• మధ్యాహ్నం వేళ మెదడుకు ఉత్సాహానిచ్చే విధంగా ఇష్టమైన వాటిని చూడటం, ఆసక్తి ఉన్న వాటికోసం సెర్చ్‌ చేయడం లాంటివి చేయాలి.