శీతాకాలం వేడి వేడిగా..!

శీతాకాలంలో వేడివేడి కూరలు తింటుంటే వచ్చే మజా వేరుగా ఉంటుంది. అలాంటి కొన్ని వంటకాలు ఎలా చేయాలో తెలుసుకుందాం...

జీడిపప్పు కోడికూర

కావాల్సిన పదార్థాలు

చికెన్‌ ముక్కలు- 750 గ్రాములు, ఉల్లిపాయ ముక్కలు-ఒక కప్పు, అల్లం వెల్లుల్లి పేస్ట్‌- ఒక స్పూను, కారం- ఒక స్పూను, పసుపు- రెండు స్పూనులు, నూనె- అరకప్పు, జీడిపప్పు- 150 గ్రాములు, గరం మసాలా- ఒక స్పూను, పెరుగు- ఒక కప్పు, తరిగిన కొత్తిమీర- రెండు స్పూనులు, ఉప్పు- తగినంత, నీళ్లు- రెండు కప్పులు, నెయ్యి- రెండు స్పూనులు

తయారీ విధానం

• ఒక మూకుడులో నెయ్యి వేసి వేడి చేయాలి. 50 గ్రాముల జీడిపప్పును వేయించి చల్లార్చాలి. మిగిలిన జీడిపప్పును కొద్దిగా నీళ్లు వేసి మిక్సీలో ముద్దగా చేయాలి.

• ఆ మూకుడులోనే నూనెను వేడి చేయాలి. దీనిలో ఉల్లిపాయ ముక్కలు, గరం మసాలా వేసి వేయించాలి.

• ఉల్లిపాయ ముక్కలు కొద్దిగా వేగిన తర్వాత చికెన్‌ ముక్కలు వేయాలి. పెరుగు కూడా వేయాలి. మూత పెట్టి బాగా మగ్గనివ్వాలి.

• చికెన్‌ ముక్కలు బాగా ఉడికిన తర్వాత దానిలో అల్లం వెల్లులి పేస్ట్‌, పసుపు, కారం, ఉప్పు వేయాలి. రెండు కప్పుల నీళ్లు పోసి ఉడకనివ్వాలి.

• ఆ తర్వాత జీడిపప్పు పేస్ట్‌ వేసి 10 నిమిషాలు ఉడకనివ్వాలి.

• కూరను దింపే ముందు దానిలో వేయించిన జీడిపప్పు, తరిగిన కొత్తిమీర చల్లాలి.

జాగ్రత్తలు

• చికెన్‌ ముక్కలు మరీ చిన్నగా.. లేదా మరీ పెద్దగా లేకుండా చూసుకోవాలి.

• చిక్కటి పెరుగు వేస్తే రుచి చాలా బావుంటుంది.

• పసుపు రెండు స్పూన్ల కన్నా ఎక్కువ వేయకూడదు. ఎక్కువ వేస్తే చిరు చేదు వస్తుంది.

బజ్జీ మిర్చీ కూర

కావాల్సిన పదార్థాలు

బజ్జీ మిర్చీ- అర కిలో, జీలకర్ర- ఒక స్పూను, నిమ్మరసం- 4 స్పూన్లు, నూనె- ఒక కప్పు, నువ్వులు- 100 గ్రాములు, తురిమిన ఎండు కొబ్బరి- 200 గ్రాములు, ఉప్పు- తగినంత, నీళ్లు- తగినన్ని

తయారీ విధానం

• బజ్జీ మిర్చీని బాగా కడిగి సగం చీరాలి.

• నువ్వులు, తురిమిన ఎండు కొబ్బరిని కలిపి మిక్సీలో వేసి పొడి చేయాలి.

• ఒక మూకుడులో నూనె వేసి వేడి చేయాలి. దానిలో బజ్జీ మిర్చీ వేసి వేయించాలి. వాటిని బయటకు తీసి చల్చార్చాలి.

• మిగిలిన నూనెలో జీలకర్ర వేసి వేయించాలి. ఆ తర్వాత నువ్వులు, ఎండుకొబ్బరి పొడిని వేసి వేయించాలి. దానిలో నీళ్లు వేసి ఉడకనివ్వాలి. కొద్ది సేపటి తర్వాత నూనె పైకి తేలుతుంది. అప్పుడు తగినంత ఉప్పు వేసుకోవాలి.

• నూనె పైకి తేలిన తర్వాత మిర్చీని వేసి బాగా ఉడకనివ్వాలి.

జాగ్రత్తలు

బజ్జీ మిర్చీని చీల్చకుండా నూనెలో నేరుగా వేయకూడదు. వేస్తే నూనె పైకి చిమ్మే ప్రమాదం ఏర్పడుతుంది.

ఈ కూరను అన్నంలో తినాలంటే కొద్దిగా పలచగా చేసుకోవచ్చు. చపాతీలలో తినాలంటే మాత్రం చిక్కగా చేసుకుంటే బావుంటుంది.

కోడిగుడ్డు సాలన్‌

కావాల్సిన పదార్థాలు

ఉడికించిన కోడిగుడ్లు- ఆరు, ఉల్లిపాయ ముక్కలు- ఒక కప్పు, అల్లం వెల్లుల్లి పేస్ట్‌- ఒక స్పూను, కారం- ఒక స్పూను, పసుపు- పావు స్పూను, నూనె- అర కప్పు, చింతపండు గుజ్జు- అరకప్పు, ఉప్పు- తగినంత, వేరుశనగపప్పు- రెండు స్పూనులు, గసగసాలు- ఒక స్పూను, నువ్వులు- ఒక స్పూను, తురిమిన ఎండు కొబ్బరి- మూడు టేబుల్‌ స్పూనులు, ధనియాలు- ఒక స్పూను, జీలకర్ర- ఒక స్పూను, నీళ్లు- తగినన్ని

తయారీ విధానం

• ఒక మూకుడులో గసగసాలు, నువ్వులు, వేరుశనగపప్పు, ఎండు కొబ్బరి, ధనియాలు, జీలకర్ర వేసి పొడి చేయాలి.

• ఉడకబెట్టిన కోడిగుడ్లపై పొర తీసి రెండేసి ముక్కలుగా చేయాలి.

• ఒక మూకుడులో నూనె వేడి చేసి ఉల్లిపాయలు వేయించాలి. దానిలో అల్లం వెల్లుల్లి పేస్ట్‌, కారం, పసుపు, ఉప్పు వేసి కొద్దిగా నీళ్లు పోయాలి.

• ఈ నీళ్లలో ముందుగా చేసుకున్న పొడి.. చింతపండు గుజ్జు వేసి కలపాలి. బాగా ఉడికిన తర్వాత ఉడకబెట్టిన కోడిగుడ్డు ముక్కలను దీనిలో వేయాలి.

జాగ్రత్తలు

• కోడిగుడ్లను ఎక్కువగా ఉడకబెట్టకూడదు. సగం ఉడకబెట్టిన గుడ్లు సరిపోతాయి.

• చింతపండు గుజ్జు తగినంతే వేయాలి. ఎక్కువ అయితే సాలన్‌ రుచిలో తేడా వస్తుంది.