గొంతు నొప్పికి ఉపశమనం...

ఆహారం వల్ల కావొచ్చు.. వాతావరణం మారినపుడు కావొచ్చు.. కొన్ని రకాల ఇన్‌ఫెక్షన్లు వస్తుంటాయి. వాటిలో గొంతు నొప్పి ఒకటి. మంటతో పాటు తిన్న ఆహారం మింగలేకపోవటం లాంటి సమస్యలుంటాయి. ఈ గొంతు నొప్పినుంచి ఉపశమనం పొందాలంటే ఈ చిట్కాలు పాటించాలి.

• గొంతు నొప్పి ఉన్నప్పుడు చల్లని నీరు తాగకూడదు. గోరు వెచ్చని నీళ్లు తాగాలి. వెనిగర్‌ను పుక్కిలించటం వల్ల మంచి ఫలితం ఉంటుంది. అల్లంలో బ్యాక్టీరియాను పోగొట్టే లక్షణాలుంటాయి. అందుకే చిన్న ముక్క వేసి నీళ్లు కాచుకోవాలి. ఆ నీటిని తాగాలి లేదా అల్లం టీ తాగవచ్చు.

• నీళ్లలో తులసి ఆకులు వేసి మరిగించాలి. చల్లార్చిన తర్వాత తాగాలి. లేకుంటే రెండు స్పూన్ల తులసిరసంలో స్పూన్‌ తేనె కలిపి తాగాలి. గొంతు నొప్పి తగ్గిపోతుంది.

• నీటిలో టీస్పూన్‌ అల్లం రసం వేసి అందులోకి తేనే కలిపి తాగితే తక్షణ ఉపశమనం లభిస్తుంది.

• గోరు వెచ్చని పాలల్లో చిటికెడు పసుపు వేసి తాగటం వల్ల కూడా చక్కని ఫలితం ఉంటుంది.

• మూడు కప్పులు నీళ్లలో కొద్దిగా వాము వేసి మరిగించాలి. గోరు వెచ్చని వాము నీళ్లను తాగాలి.

• తమలపాకు రసంలో కొద్దిగా తేనె వేసి కలిపి తాగాలి. సూప్‌లు తాగితే ఉపశమనం ఉంటుంది. కారం, మసాలా, ఐస్‌క్రీమ్స్‌ జోలికి పోకూడదు. మరీ ఇబ్బందిగా ఉంటే మాత్రం వైద్యుడిని సంప్రదించాలి.