నీళ్లవల్ల ప్రయోజనాలెన్నో

ఆరోగ్యంగా ఉండాలంటే ప్రతి రోజు గరిష్టంగా మూడు లీటర్ల నీళ్లు తాగాలని పౌష్టికాహార నిపుణులు సూచిస్తున్నారు. దీని వల్ల అనేక ప్రయోజనాలు ఉంటాయని చెబుతున్నారు. ఆ ప్రయోజనాలేమిటో చూద్దాం..

• ఉదయాన్నే లేచి నీళ్లు తాగటం వల్ల మొత్తం రోజంతా చురుకుగా ఉండగలుగుతారు. మెదడు పనితీరు మెరుగుపడుతుంది.

• నీళ్లు తాగటం వల్ల శరీర ఉష్ణోగ్రత నియంత్రణలో ఉంటుంది.

• జీర్ణ వ్యవస్థ సక్రమంగా పనిచేయటానికి నీళ్లు ఎంతో ఉపకరిస్తాయి. శరీరంలో పేరుకుపోయిన మలినాలను బయటకు పంపటంలో నీళ్లు కీలకమైన పాత్ర పోషిస్తాయి. క్రమం తప్పకుండా ప్రతి రోజూ మూడు లీటర్ల నీళ్లు తాగితే జీర్ణ వ్యవస్థ పనితీరు ఎంతో మెరుగుపడుతుంది.

• శరీరంలోని కణాలకు పోషకాలు, ఆక్సిజన్‌ వంటివి అందించటంలో నీళ్లు ఉపకరిస్తాయి. తగినన్ని నీళ్లు తాగితే రక్త ప్రసరణ కూడా మెరుగుపడుతుంది.

• నీళ్లు తక్కువగా తాగితే దాని ప్రభావం మన చర్మంపై పడుతుంది. చర్మం పొడిబారిపోతుంది. నీళ్లు ఎక్కువగా తాగితే చర్మం మెరుస్తూ ఉంటుంది.

• రోజుకు మూడు లీటర్ల నీళ్లు తాగితే ఆకలి తగ్గుతుంది. దీని వల్ల ఏదో ఒక ఆహారం తింటూ ఉండాలనే యావ తగ్గిపోతుంది. దీని వల్ల బరువు తగ్గే అవకాశముంటుంది.