NRI News: డెట్రాయిట్‌ తెలుగు అసోసియేషన్‌ ఆధ్వర్యంలో ఘనంగా దీపావళి

డెట్రాయిట్‌ తెలుగు అసోసియేషన్‌ (DTA) ఆధ్వర్యంలో నవంబర్‌ 2న కాంటన్‌ హిందూ టెంపుల్‌‌ దీపావళి వేడుకలు అంగరంగ వైభవంగా జరిగాయి. 700 మందికిపైగా ఈ వేడుకకు తరలివచ్చారు. అతిథులు, ఆహ్వానితులు పాల్గొన్నారు. సంస్కృతి, ఐక్యతను ప్రతిబింబించేలా ఈ వేడుకలు సాగాయని డీటీఏ ప్రెసిడెంట్‌ కిరణ్‌ దుగ్గిరాల తెలిపారు. ఉదయం జరిగిన సాంస్కృతిక కార్యక్రమాల్లో 250కి పైగా పిల్లలు తమ ప్రతిభను ప్రదర్శించి ఆకట్టుకున్నారని వివరించారు. సాయంత్రం రఘు కుంచె, అంజనా సోమ్యా లైవ్‌ మ్యూజిక్‌ ప్రదర్శనతో ఈవెంట్‌లో పాల్గొన్నవారంతా పరవశించిపోయారు. ‘చక్రవాకం’ ఫేమ్‌ ఇంద్ర నీల్‌ ప్రత్యేక ప్రైమ్‌ టైమ్‌ షో కూడా అందరిలోనూ ఉత్సాహాన్ని, ఆనందాన్ని కలిగించిందని కిరణ్ దుగ్గిరాల చెప్పారు.

ఈ కార్యక్రమంలో భాగంగా 30 ఏళ్లకు పైగా డీటీఏలో క్రియాశీలకంగా ఉన్న ఏక్క వెంకట్‌‌కు ప్రతిష్టాత్మకమైన వడ్లమూడి వెంకట రత్నం అవార్డును ప్రదానం చేశారు. సన్నీ రెడ్డికి డీటీఏ కమ్యూనిటీ లీడర్‌ షిప్‌ అవార్డును, జ్ఞానేశ్వర గుబ్బలకు డీటీఏ అవుట్‌స్టాండిరగ్‌ కమ్యూనిటీ సర్వీస్‌ అవార్డును అందజేశారు. ఈ వేడుకలకు మేరిలాండ్‌ లెఫ్టినెంట్‌ గవర్నర్‌ అరుణ కాట్రగడ్డ మిల్లర్‌ హాజరయ్యారు. ప్రవాసులు భవిష్యత్‌ నిర్మాణంలో ఎలా కీలకంగా వ్యవహరించగలరో వివరిస్తూ అరుణ కాట్రగడ్డ స్ఫూర్తిదాయకమైన ప్రసంగం చేశారు.

డీటీఏ ఎగ్జిక్యూటివ్‌ కమిటీ సభ్యులు సుబ్రతా గడ్డం, రాజా తొట్టెంపూడి, కుసుమ కళ్యాణి అక్కిరెడ్డి, అర్చన చవళ్ల, మంజీరా పాలడుగు, ప్రణీత్‌ వెళ్లొరె, స్వప్న ఎల్లెందుల, తేజ్‌ కైలాష్‌, సంజీవ్‌ పెడ్డి తదితరులు దీపావళి వేడుకలు విజయవంతం కావడానికి కృషి చేశారు. సలహా కమిటీ సభ్యులు జో పెద్దిబోయిన, నీలిమా మన్నె, సుధీర్‌ బాచు మార్గదర్శకత్వం చేయడంతోపాటు, మద్దతు అందించినందుకు వారికి ప్రెసిడెంట్‌ కిరణ్‌ దుగ్గిరాల హృదయపూర్వక ధన్యవాదాలు తెలిపారు. అలాగే తానా నాయకులు సునీల్‌ పంత్రా, ఉదయ్‌ కుమార్‌ చాపలమడుగు, శ్రీనివాస గోగినేని తదితర నాయకులు, ఎస్‌వీ బోర్డు ఛైర్మన్‌ శ్రీనివాస్‌ కొనేరు, ఇతర విశిష్ట అతిథులు వేడుకల్లో పాల్గొని అందరికీ దీపావళి శుభాకాంక్షలు తెలియజేశారు.