Bahrain: తెలుగు కళా సమితిలో మార్మోగిన గణపతి బప్పా
ABN, Publish Date - Sep 10 , 2024 | 08:41 PM
లంబోదరశ్చ వికటో విఘ్న రాజః అని వినాయకుడ్ని షోడశ నామాల్తో కొలుస్తూ బహ్రెయి‌న్‌లో తెలుగు ప్రవాసీ కుటుంబాలు భక్తితో పరవశిస్తూ వినాయక చవితిని అత్యంత వైభవంగా జరుపుకొన్నారు.
ఆంధ్రజ్యోతి గల్ఫ్ ప్రతినిధి: లంబోదరశ్చ వికటో విఘ్న రాజః అని వినాయకుడ్ని షోడశ నామాల్తో కొలుస్తూ బహ్రెయి‌న్‌లో తెలుగు ప్రవాసీ కుటుంబాలు (NRI) భక్తితో పరవశిస్తూ వినాయక చవితిని అత్యంత వైభవంగా జరుపుకొన్నారు. ఆదిలీయాలోని తెలుగు కళా సమితి ప్రాంగణం గణపతి బప్పా మోరియా… మంగళ మూర్తి మోరియా కీర్తనలతో మార్మోగిపోయింది.
NRI News: గల్ఫ్‌లో గణనాథా నమోనమః
తెలుగు కళా సమితి సభ్యులు ఉత్సాహంతో ఆకర్షణీయంగా అలంకరించిన వినాయక చవితి మండపం, దాని పరిసరాలు ఆహ్లాదకరంగా భక్తులను ఆకట్టుకుంది. దేశ వ్యాప్తంగా వివిధ ప్రాంతాలలో ఉన్న తెలుగు ప్రవాసీయుల కుటుంబాలతో పాటు ఇతర రాష్ట్రాలకు చెందిన భక్తులు సైతం పూజలు చేసారు. మూడు రోజుల పూజల అనంతరం బొజ్జ గణపయ్యను సోమవారం అరేబియా సముద్ర జలాలలో నిమజ్జనం చేసారు. రమణ్ రావు, లత దంపతులు, మోహన్ మురళీధర్‌లు రూపొందించిన మండపం హైందవ సంప్రదాయాన్ని ప్రతిబింబించింది. స్థానిక పురోహిత ప్రముఖులు శ్రీనివాస్ వెంపర్లా వేద మంత్రోచ్చారణతో చేసిన అర్చక సేవలతో భక్తులు పరవశించిపోయారు.
పూజలు, ఇతర భక్తి కార్యక్రమాల నిర్వహణలో పద్మ రఘు, లక్ష్మి శర్మ, విజయ, అంజలీ, సౌజన్య సుప్రదీప్, లలిత శ్రీనివాస్, సౌజన్య ప్రకాశ్, స్వప్న,లావణ్య, లక్ష్మి గంగాసాయి, స్వాతి తదితరులు సహకరించగా తెలుగు ప్రవాసీ ప్రముఖులు పి.వి. సుబ్రమణ్యం, జె.వి.ఆర్.మూర్తి, రఘునాథ బాబు, ఆర్.యస్.యస్. మురళీ, హరిబాబు, శివలు తమ సహాయసహకారాలందించారు.
బహ్రెయిన్‌లోని తెలుగు ప్రవాసీయుల కోసం అన్ని పండుగలను సంప్రదాయక రీతిలో తెలుగు కళా సమితి నిర్వహిస్తుంది.
Updated Date - Sep 10 , 2024 | 08:44 PM
