Glenn Maxwell: అలా అన్నందుకే కోహ్లీ నన్ను బ్లాక్ చేశాడు: ఆసిస్ క్రికెటర్

ముంబై: భారత స్టార్ బ్యాట్స్ మెన్ విరాట్ కోహ్లీ గురించి ఆస్ట్రేలియా ఆల్ రౌండర్ గ్లెన్ మ్యాక్స్ వెల్ ఆసక్తికర విషయాలను వెల్లడించాడు. ఇద్దరూ ఎంతో మంచి స్నేహితులమైనప్పటికీ ఒకప్పుడు వీరిద్దరి మధ్య కోల్డ్ వార్ నడిచినట్టు తెలిపాడు. ఐపీఎల్లో రాయల్ ఛాలెంజర్స్ బెంగళూరు తరఫున వీరిరువురూ ఆడుతున్న సంగతి తెలిసిందే. అయితే, కోహ్లీ తనను ఇన్ స్టా గ్రామ్ లో బ్లాక్ చేసిన సందర్భాన్ని మ్యాక్స్ వెల్ గుర్తుచేసుకున్నాడు.

అందుకే బ్లాక్ చేశాడు..

‘‘విరాట్ పోస్టులు నాకు చూపించేవి కాదు. ఓ సారి ఇదే విషయాన్ని నేరుగా అతన్నే కలిసి నన్ను బ్లాక్ చేశావా అని అడిగాను. నువ్వు నన్ను ఎగతాళి చేయడం నాకు నచ్చలేదు అందుకే చేశా అని కోహ్లీ సమాధానం ఇచ్చాడు. దానికి నేను మంచి పని చేశావ్ నిజంగా నేను నీతో అలా ప్రవర్తించి ఉండకూడదు అని సారీ చెప్పాను. అయితే నేను ఆర్సీబీకి వెళ్తున్నప్పుడు నాకు మెసేజ్ చేసి జట్టులోకి స్వాగతం పలికిన మొదటి వ్యక్తి కోహ్లీనే. ఐపీఎల్ కి ముందు శిక్షణా శిబిరానికి నేను వచ్చినప్పుడు ఇద్దరం కలిసి చాలా మాట్లాడుకునేవాళ్లం. అలా మంచి స్నేహితులమయ్యాం’’ అని మ్యాక్స్ వెల్ తెలిపాడు.

వీరి మధ్య గొడవేంటి..?

2017లో భారతత్ జరిగిన టెస్టు సిరీస్ లో మ్యాక్స్ వెల్ కోహ్లీని ఆటపట్టించాడు. రాంచీ టెస్టు తొలి రోజు ఫీల్డింగ్ చేస్తున్న సమయంలో కోహ్లీ భుజానికి గాయమైంది. అదే సమయంలో ఆస్ట్రేలియా జట్టు ఫీల్డింగ్ కు వచ్చిన సమయంలో మ్యాక్స్ వెల్ తన భుజాన్ని పట్టుకుని విరాట్ ను అనుకరించే ప్రయత్నం చేశాడు. దానికి విరాట్ కు కోపమొచ్చి ఇన్ స్టాగ్రామ్ లో అతడిని బ్లాక్ చేశాడు. ఇప్పుడు వీరిద్దరూ మంచి స్నేహితులు.