Viral Video: టెన్నిస్ మ్యాచ్‌ను ఎంజాయ్ చేస్తున్న కుక్క.. ఆ ఎక్స్‌ప్రెషన్స్ చూస్తే ఆశ్చర్యపోవాల్సిందే..

ఉత్కంఠగా సాగే మ్యాచ్‌లు (Sports) చూడడం భలే థ్రిల్లింగ్‌గా ఉంటుంది. ముఖ్యంగా టెన్నిస్, ఫుట్‌బాల్, క్రికెట్ వంటి క్రీడలు చక్కని వినోదంతో పాటు అదిరిపోయే థ్రిల్‌ను కూడా అందిస్తాయి. స్పోర్ట్స్ చూస్తున్న సమయంలో కలిగే ఆ ఉత్కంఠ మనుషులకే కాదు.. కుక్కలకు (Dog) కూడా ఉంటుందని ప్రస్తుతం వైరల్ అవుతున్న ఓ వీడియో చూస్తే అర్థమవుతుంది. బ్రెజిల్‌ (Brazil)లో జరిగిన బీచ్ టెన్నిస్ మ్యాచ్‌ను (Beach tennis match) ఓ పెంపుడు కుక్క చక్కగా ఆస్వాదించింది. మనుషులలాగానే హావభావాలను ప్రదర్శించింది. ఆ వీడియో సోషల్ మీడియాలో వైరల్‌గా మారింది (Viral Video).

aikasamoyed అనే ఇన్‌స్టాగ్రామ్ హ్యాండిల్‌లో ఈ వీడియో షేర్ అయింది. వైరల్ అవుతున్న ఆ వీడియో ప్రకారం.. బ్రెజిల్‌లో ఓ బీచ్‌లో టెన్నిస్ మ్యాచ్ జరుగుతోంది. ఆ మ్యాచ్ చూసేందుకు పెద్ద సంఖ్యలో ప్రజలు హాజరయ్యారు. ఒక వ్యక్తి మ్యాచ్ చూసేందుకు తనతో పాటు తన పెంపుడు కుక్కను కూడా తీసుకొచ్చాడు. ఆ కుక్క కూడా ఆ టెన్నిస్ మ్యాచ్‌లో లీనం అయిపోయింది. అటూ ఇటూ చూస్తూ మ్యాచ్‌ను చక్కగా ఎంజాయ్ చేసింది. స్టేడియంలో ఉన్న ఓ వ్యక్తి వీడియో తీసి సోషల్ మీడియాలో పోస్ట్ చేశాడు. ఆ వీడియో కాస్తా వైరల్‌గా మారింది.

గేమ్ జరుగుతున్న కొద్దీ కుక్క పూర్తిగా మనుషుల్లాగానే హావభావాలను ప్రదర్శించింది. అంతేకాదు చివర్లో రెండు చేతులను దగ్గరకు తీసుకొచ్చి చప్పట్లు కొట్టింది. ఈ వైరల్ వీడియోను ఇప్పటివరకు లక్షల మంది వీక్షించారు. వేల మంది ఆ వీడియోను లైక్ చేశారు. ఆ వీడియోపై నెటిజన్లు తమ స్పందనలను తెలియజేశారు. ``మనుషుల కంటే ఎక్కువగా మ్యాచ్‌ను ఎంజాయ్ చేస్తోంది``, ``ఆ కుక్క టికెట్ తీసుకోకుండానే గొప్పగా ఎంజాయ్ చేసింది`` అంటూ నెటిజన్లు కామెంట్లు చేశారు.

మరిన్ని క్రీడా వార్తలు కోసం క్లిక్ చేయండి..