మే 9,10 తేదీల్లోనూ మోదీ పర్యటన!
ABN, Publish Date - Apr 28 , 2024 | 04:54 AM
రాష్ట్రంలో బీజేపీ అగ్రనేతల ప్రచారం ముమ్మరం కానుంది. ప్రధాని నరేంద్రమోదీ, కేంద్ర హోంమంత్రి అమిత్‌షా, జాతీయ అధ్యక్షుడు జేపీ నడ్డాలు పార్టీ అభ్యర్థులకు మద్ధతుగా
రాష్ట్రంలో బీజేపీ అగ్రనేతల ప్రచారం ముమ్మరం కానుంది. ప్రధాని నరేంద్రమోదీ, కేంద్ర హోంమంత్రి అమిత్‌షా, జాతీయ అధ్యక్షుడు జేపీ నడ్డాలు పార్టీ అభ్యర్థులకు మద్ధతుగా విస్తృత ప్రచారం చేయనున్నారు. ప్రధాని మోదీ మే 9, 10 తేదీల్లో కూడా ఎన్నికల ప్రచారం నిర్వహించనున్నారు. ప్రచారం క్లైమాక్స్‌ దశలో ఆయన, బహిరంగసభలు, రోడ్‌ షోల్లో పాల్గొననున్నారని పార్టీవర్గాలు తెలిపాయి. మే 3న కూడా మోదీ పర్యటన ఉంటుందని, అయితే ఏ నియోజకవర్గంలో ఆ పర్యటన ఉంటుందనేది ఒకటి, రెండు రోజుల్లో ఖరారవుతుందని పార్టీ నేతలు తెలిపారు. ఇప్పటివరకు ఖరారైన షెడ్యూలు ప్రకారం, ఈనెల 30న సంగారెడ్డి జిల్లా అల్లాదుర్గ్‌ మండలం సిల్వర్‌ గ్రామం వద్ద ఏర్పాటుచేసే బహిరంగసభలో మోదీ పాల్గొంటారు. అలాగే కేంద్ర హోంమంత్రి అమిత్‌ షా మే 1న చార్మినార్‌ అసెంబ్లీ సెగ్మెంటు పరిధిలోని గౌలిపురాలో సాయంత్రం 5 గంటలకు నిర్వహించే రోడ్‌ షోలో పాల్గొంటారు. ఈనెల 29న సాయంత్రం 5 గంటలకు మల్కాజ్‌గిరి పార్లమెంటు నియోజకవర్గ పరిధిలోని నిజాంపేటలో నిర్వహించే రోడ్డు షోలో బీజేపీ జాతీయ అధ్యక్షుడు జేపీ నడ్డా పాల్గొంటారు. అదేరోజు ఉదయం 11 గంటలకు కొత్తగూడెంలో, మధ్యాహ్నం 12.30 గంటలకు మహబూబాబాద్‌లో నిర్వహించే బహిరంగసభల్లోనూ ఆయన పాల్గొంటారు.
Updated Date - Apr 28 , 2024 | 07:36 AM
