కొరియోగ్రాఫర్‌ జానీ మాస్టర్‌పై రేప్ కేసు..
ABN, Publish Date - Sep 16 , 2024 | 02:21 PM
ప్రముఖ కొరియోగ్రాఫర్‌ జానీ మాస్టర్ అలియాస్ షేక్ జానీ బాషాపై అత్యాచారం కేసు నమోదైంది. పలుమార్లు లైంగిక దాడికి పాల్పడ్డారంటూ ఓ యువతి ఫిర్యాదు చేయడంతో రాయదుర్గం స్టేషన్ పోలీసులు కేసు నమోదు చేశారు.
హైదరాబాద్: ప్రముఖ కొరియోగ్రాఫర్‌ జానీ మాస్టర్ అలియాస్ షేక్ జానీ బాషాపై అత్యాచారం కేసు నమోదైంది. పలుమార్లు లైంగిక దాడికి పాల్పడ్డారంటూ ఓ యువతి ఫిర్యాదు చేయడంతో రాయదుర్గం స్టేషన్ పోలీసులు కేసు నమోదు చేశారు. సెక్షన్ 376 రేప్ కేసుతోపాటు క్రిమినల్ బెదిరింపు (506), గాయపరచడం(323) క్లాజ్ (2) సెక్షన్ల కింద ఎఫ్‌ఐఆర్ నమోదు చేశారు. అత్యాచారంతోపాటు బెదిరించి కొట్టాడంటూ బాధితురాలు తన ఫిర్యాదులో ఆరోపించింది. ఫిర్యాదు చేసిన యువతి వయసు 21సంవత్సరాలు. గత కొంతకాలంగా తనపై జానీ మాస్టర్ లైంగిక దాడులకు పాల్పడుతున్నాడని యువతి ఫిర్యాదులో పేర్కొంది.
ఫిర్యాదులో బాధిత యువతి సంచలన విషయాలు వెల్లడించింది. 2017లో ఓ ఛానల్‌లో ప్రసారమైన ప్రముఖ డ్యాన్స్ షో ద్వారా జానీ మాస్టర్ తనకు పరిచయమైనట్లు ఎఫ్‌ఐఆర్‌లో యువతి పేర్కొంది. ఆ తర్వాత జానీ మాస్టర్‌కు అసిస్టెంట్ కొరియోగ్రాఫర్‌గా ఉండాలంటూ ఆయన టీమ్ తనకు ఫోన్ చేశారని, 2019లో జానీ మాస్టర్ టీమ్‌‌లో తాను చేరి అసిస్టెంట్ కొరియోగ్రాఫర్‌గా పని చేస్తున్నట్లు తెలిపింది. ఒక షో కోసం జానీ మాస్టర్, మరో ఇద్దరితో కలిసి ముంబైకి వెళ్లినప్పుడు బస చేసిన హోటల్లో జానీ అత్యాచారానికి పాల్పడ్డాడని తెలిపింది. ఈ విషయాన్ని బయట ఎవరికీ చెప్పవద్దంటూ బెదిరించాడని వెల్లడించింది. షూటింగ్ సమయాల్లో కూడా అతడు చెప్పినట్టు వినకపోతే అసభ్యకరంగా ప్రవర్తించేవాడని పోలీసులకు ఇచ్చిన ఫిర్యాదులో యువతి పేర్కొంది. తరచూ తనపై జానీ మాస్టర్ అసభ్యకరంగా ప్రవర్తించేవాడని, లైంగిక వేధింపులకు పాల్పడేవాడని తెలిపింది. మతం మార్చుకొని తనను పెళ్లి చేసుకోవాలంటూ జానీ మాస్టర్ బలవంతం చేశాడని ఆమె వివరించింది.
Updated Date - Sep 16 , 2024 | 02:21 PM
